Ñahendu Hesu Ñe’ê. Domingo V Cuaresma

Escucha el evangelio y la reflexión en: https://youtu.be/mBIWGXek2L4

Domingo V Cuaresma Ciclo A. Juan11, 1-7. 20-27. 33b-44

Oiko vaekue Betániape peteĩ kuimba’e hasýva hérava Lázaro. Iteindýra mokõi héra
vaekue María ha Marta. María niko hína ku oñohẽ vaekue Jesús pýre mba’e ryakuã porã, ha
upéi omokã hi’ávape. Umi mokõi Lázaro reindy he’ika Jesúspe: — Karai, ne irũ
rehayhuetéva niko oime hasy hína.

Jesús ohendúvo he’i: — Kóva ko mba’asýguinte, Lázaro nomano mo’ãi. Ohechaukáta uvei
mba’eichaitépa tuicha Ñandejára ha Ñandejára Ra’y.

Jesús niko ohayhu Marta, María ha Lázarope. Ha oje’e ramo jepe chupe Lázaro hasyha,
opytavénte upe oikoha rupi mokõi ára. Upéi katu he’i idisípulokuérape: — Jaha jey mba’e
Judéape.

Marta ohendúvo Jesús og̃uahẽha oúvo, osẽ huvãitĩvo. María katu opyta hógape. Marta
he’i Jesúspe: — Mbo’ehára, reime rire ko’ápe niko che kyvy nomanói vaerã mo’ã. Aikuaa
jepe niko Ñandejára ikatúne hag̃ua ome’ẽ ndéve oimeraẽ mba’e chupe rejeruréva.
Jesús he’i chupe: — Nde kyvy oikove jeýta.

Marta he’i chupe: — Che niko aikuaa ág̃a ára pahápe oikove jeytaha, opa umi omano
vaekue oikove jeývo.

Upépe Jesús he’i chupe: — Chéko hína pe amoingove jeýva opa omanóva. Che rehe
ojeroviáva, omano ramo jepe oikovéta. Ha opa oikovéva ha ojeroviáva che rehe, nomano
mo’ãi araka’eve. Ndéiko rerovia ko’ã mba’e.

Ha Marta he’i chupe: — Arovia che Jára. Che arovia ndeha pe Mesías, Ñandejára Ra’y,
pe ou vaerãva ko yvy ári.

Tuicha oñembyasy Jesús ohechávo mba’éichapa María ha umi hendive ou va’ekue
ojahe’o. Tuicha oguapy hese upéva. Oporandu chupekuéra: — Moõiko pemoĩ ra’e hetekue.
He’i hikuái chupe: — Eju ehecha, ore Jára.

Ha upévo Jesús hasẽ. Ha umi upépe oĩva he’i: — Pehecháiko mba’éichapa ohayhu ra’e
chupe.

Oĩ katu he’íva: — Ohecha’ỹvape niko omonguera vaekue. Ndaikatúi nga’u piko ra’e
ojoko Lázaro omano’ỹ hag̃ua.

Jesús oñembyasy eterei jey oñembojávo pe itakuápe. Pe itakua juru oñemboty peteĩ itápe.
Jesús he’i umi hénte kuérape: — Peipe’a ko ita.

Marta katu osẽ he’i chupe: — Che Jára, inéma va’erã niko hína, 4 árama niko omano
hague.

Jesús he’i chupe: — Nda’éinga’u piko ra’e ndéve, rejeroviárõ che rehe rehechataha Tupã
Ñandejára tuichaha.

Ha ombyapajeréi hikuái pe ita pe itakua jurúgui. Jesús oma’ẽ yvága gotyo ha he’i:
— Che Ru, romomba’e, nde che rendu haguére. Aikuaa niko che renduha. Ha’énte ndéve
péicha umi ko’ápe oĩva oguerovia hag̃ua ndeha pe che mbou va’ekue.

Péicha he’i rire, osapukái: — Lázaro, esẽ okápe.

Ha pe omanóma vaekue osẽ okápe. Umi ipo ha ipy hamba’e ojejokuapa génerope. Hova
katu ojejaho’i pañuélope. Jesús he’i upépe: — Pejora ha peipe’apa chugui umi mba’e ha
peheja toho.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ivaiete vove niko ñande ja’éva: oime piko Ñandejára hesarái mba’e ñande hegui, ajeve péicha ñaime. Hesu oguahẽvo Lázaro oime hápe heindy Marta osẽ he’i chupe: reime rire ko’ápe Lázaro nomanói va’erã mo’ã. Ha upépe Hesu hasẽ soro. Tuicha oñembyasy ohechávo umi ha’e ohayhúva ohasa asyha. Ha upéicha che reindy ha nde che irũ, Ñandejára ndahesaráiri ñande hegui, ha’e oñembyasy ha ou ohupi ñanendive ñande kurusu, jareko haguã hendive tekove pyahu opa ve’ỹva.

ÑAÑEMBO’E OÑONDIVE

Ñandejára Hesukrísto rehecháva reína pe arai hũ opu’ãva ore rekovépe ore mo’ã, pytũme ore aho’i haguãicha. Nde niko rehayhúgui Lázaro pe emoingove jevy ha enohẽ va’ekue ichupe mano poguýgui. Aníkena eheja ipu’aka ore rehe mba’eveichagua mba’e vai, ha ne mborayhu ta oremopeteĩ roñangareko haguã ojuehe. Amén.

Pa’i Alberto Luna.