Ñahendu Hesu Ñe’ê. Sábado IV Cuaresma

Escucha el evangelio y la reflexión en: https://youtu.be/T61otXOdCw8

Sábado IV Cuaresma Juan 7, 40 – 53.

Upérõ umi ojapysakáva Jesús rehe apytépe, ohendúvo umi mba’e Jesús he’íva, osẽ
he’i: — Kóva niko proféta.

Oĩ katu he’íva: — Kóva hína pe Mesías.

Ha oĩve katu he’íva: — Mba’e proféta katu piko oúta Galiléagui. Ñandejára ñe’ẽme
niko he’i pe Mesías, rréi David ñemoñare vaerãha. Péicharõ niko ou vaerã Belén
puéblogui rréi David onase haguépe.

Ha péicha, oĩ umi oñemoĩva Jesús ndive ha oĩ ave umi oñemoĩva hese. Ha oĩ ramo jepe umi oapresaséva Jesúspe, avave noñanimái opoko hese.

Umi guárdia tupaopegua ojevývo umi fariséo ha pa’i ruvicha kuéra rendápe, oporandu chupe kuéra hikuái: — Mba’ére piko ndapeguerúi.

Umi guárdia he’i: — Ndaipóri niko avave oñe’ẽva ha’e oñe’ẽháicha.

Umi fariséo he’i chupe kuéra: — Peẽme ave piko pene mbotavy. Ndaipóri niko pa’i térã fariséo ogueroviáva chupe. Umi tekove tavýnte ojerovia hese, ndoikuaáigui hikuái umi Moisés mandamiénto. Umívape niko Ñandejára ohundítante voi.

Nicodemo, ku oho vaekue Jesús rendápe, osẽ he’i hapicha fariséokuérape:
— Ndaikatúi niko ja’e mba’eve avavére ñahendu mboyve mba’épa oguereko he’i va’erã ijehe, ha jaikuaa porã mboyve mba’épa ojapo. Upéva niko ñande léi.

Osẽ hapicha fariséokuéra he’i chupe: — Nde oime vaerã Galileagua mba’e hína.

Ehechána mba’épa he’i Ñandejára Ñe’ẽme. Rejuhúta he’iha mba’eveichagua proféta
nosẽiha voínte Galiléagui. Upéi katu, osẽ ohopa hikuái hógape.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mávapa ñanerekombo’éta, ñande resape’a ha ñande renohẽta tapépe. Mávapa ñande salváta ha ñande pe’áta jejopy vaígui. Ikatu niko ñapensa umi karai arandu ijestúdio pukúva, mburuvichakuéra táva guasugua, pa’i guasukuéra ha mba’e.

Anichéne ñande rapicha ilápi mbykýva, kampáñagua, campesino, indígena, mba’apohára mba’e ou ohechauka ñandéve mba’épa jajapo va’erã.

Umi judío kuéra ndojeroviái ete voi Hesúre ha’e niko ndaha’éi siudagua, ndaha’éi pa’i guasukuéra rehegua, ou kampáña Galiléagui, Nazarégui, tava’i kañy háime ndojekuaáivagui osẽ. Ñandejára omoheñói jehovasa ha salvación ñandéve guarã upe tava’i kampáñagui, mboriahu apytégui ou Hesu, ha hese ae Ñandejára ohechauka ñandéve jeikove añete rape.

Mba’épa oiméne Ñandejára oipota ajeve ombou ita’ýra Hesu mboriahu apytégui ñanerekombo’e haguã ha ohechaukávo ñandéve tekove añete ha yvága rape. Mba’érepa
oiméne Ñandejára ohayhu mboriahu, umi ikangyvéva ha oñemboykévape. Oime piko
oipota ñande ave jahayhu ha jajapo ichupe kuéra mba’e ramo. Mba’épa reñandu nde che
irũ ha che reindy.

Pa’i Alberto Luna.