Ñahendu Hesu Ñe’ê. Jueves 12 de Diciembre

Escucha la reflexión en: https://youtu.be/IWxyr7Yc-Hc

Tupãsy Guadalúpe ára                                          Lucas 1, 39 – 48.

   Upéro María pya’ete osẽ oho peteĩ puéblope opytáva sérro pa’ũme Judápe.  Ha oikévo Zacarías rógape, omomaitei Isabélpe.  Ha ohendúvo María maitei, Isabel oñandu mba’éichapa pe mitã omýi hyépe. Upépe, Isabel henyhẽ Espíritu Sántogui.  Ha osẽ he’i Maríape: – Ñandejára niko nde rovasave ndéve opa kuña apytégui. Ha ohovasa ne memby ave.  Máva piko che, nde Ñandejára sy, reju haguã che rendápe.  Ahendúvo nde che momaiteívo, che memby omýi vy’águi che ryépe.  Ñandejára nde rovasa rerovia haguére oikotaha umi mba’e ha’e he’i vaekue ndéve.

 María he’i: – Che py’aite guive aguerohory Ñandejárape.

 Che ánga rugua guive aguerohory Ñandejára, che salvadórpe.

 Ñandejára omoĩ hesa che rehe, che niko hembiguaimínte.

Águi rire opavave he’íne chéve: «María, Ñandejára nde rovasa».

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ramoite ojeguerohory kuri Tupãsy Caacupe ára. Tuicha mba’e niko la ñande sy.

Pe tupãsy Caacupe ra’anga niko ojapo raka’e peteĩ indio guarani, hérava José, oñemongora va’ekue ojejuka haguãicha, ha oñembo’e rire tupãsyme okañy peteĩ yvyra guasu kupépe, ha ohasa umi ikontrário ha ndohechái chupe, ha upe yvyrágui ojapo raka’e José Ñande sy Tupãsy Caacupé ra’anga jarekóva amo itupao guasúpe. 

Ko ára 12 diciembre avei ñaromandu’a ñaína Tupãsy Guadalúpe, oĩva amo tetã Méxicope. Pe Tupãsy ndaje ojechauka raka’e peteĩ indio upérupi oikóvape, hérava Juan Diego, ámo áño 1500 rupi. Ha he’i chupe oipotaha ojejapo upépe peteĩ tupao guasu ikatu haguãicha upépe ou opavave oñembo’e chupe.

Juan Diego he’i pe Tupãsýme chupe avave ndorovia mo’ãiha, ha’égui peteĩ indio mboriahu tavymi. Tupãsy ndaje he’i chupe tekotevẽha katuete ha’e ojapo péva ha ndoipotái ambuépe, ha’e mante vaẽra voi. Mba’épa eremi ichupe che irũ, ha nde che reindy.

Ha oho mitã Juan Diego aipo ramo ha karai obispo ndoroviái chupe, nopenái voi hese. Ou jey itĩndymi ndoikuaágui mba’épa he’íta pe Tupãsýme, okañy kañy chugui oúvo. Upémaramo Tupãsy he’i chupe oipe’a haguã pe ipóncho ha upépe ombyaty ha omyenyhẽ haguã rósa potygui ha he’i chupe oraha haguã karai obíspope. Oho jey anga Juan Diego ipy’a ipópe oguahẽ ha omoĩvo umi yvotyeta pe obispo renondépe opyta pe ipónchore peteĩ Tupãsy ra’anga neporãva, ha’éva hina Tupãsy Guadalúpe ra’anga ojoguáva peteĩ india morénape, ha oĩva ko’ãgaite peve amo itupao guasúpe Méxicope, ha’e ojerure haguépe ojejapo haguã chupe imemby kuéra oho haguã hendápe. Ha upéva ha’e hina América latina patróna Tupãsy Guadalupe.

Pa’i Jasy.