Ñahendu Hesu Ñe’ê. Miércoles 11 de Diciembre

Escucha la reflexión en:

Mateo 11, 28 – 30

Upérõ Jesús oñe’ẽ ha he’i: “Peju che rendápe opa peẽ pene kane’õ ha pemba’apo
pohýiva, ha che ndive pepytu’úta. Peheja tamoĩ pende apére che júgo, ha pejapo che
ha’éva peẽme. Ha peikuaáta che py’a porãha ha ndajejapoiha, ha che ndive pejuhúta
pytu’u. Pe júgo amoĩ tava pende apére niko ivevúita peẽme, ha ndaipohýi mo’ãi upe
aipotáva peraha”.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ñanemandu’a oguahẽvove umi ára pohýi ñane kane’õ ha jahasa asyha, jajepokãha Ñandejárare ha ñande rapicháre ñanepytỹvomi ha ñanembovevúi haguã upe ñande jopývagui. Jajeplagueámi ha jajahéi ñande rekovére umícha jave, nañanerendái.

Ja’e voi katu: Che kuérai ko che rekovégui, amombopase opa mba’e ha aha mombyry
ko’águi mba’e. Mba’ére piko Ñandejára chéve péicha chekastiga. Mba’e mba’éiko
ajapo vaiete ra’e.

Ha sapy’ánteko ñaimo’ã hágui hina ñandénteha ñaime vaíva, jaha jajuhu
ojejopyvéva ñande hegui, oiko asyvéva, imboriahuvéva ha ombohasáva py’aguapýpe,
nahasẽngýiva ñandéicha. Mba’épa oiméne ombovevúiva ñande rapicha ojejopývape.
Hesu he’i: “Peju che rendápe opavave peẽ pene kane’õ ha peiko asýva, ha che ndive
pepytu’úta”.

Hesu niko nde’íre oipe’átaha ñande ape árigui mba’éve. Upéva rangue katu he’i:
“Pe júgo amoĩ tava pende apére niko ivevúita peẽme, ha ndaipohýi mo’ãi upe aipotáva
peraha”. Aipo ramo niko pe Hesu ñepytyvõ ndaha’éi je’u rei ha jeiko piro’y ñeha’ã’ỹre.

Upéva rangue katu ha’e ñanemombarete ha ñanembopy’a guasu jaropu’aka ha
ñahenonde’a haguã opaichagua tembiapo pohýi, opaichagua jejopy vai ha mba’asy vai
jepe ra’e, ñande py’a mano’ỹre, jajerovia pype ha’e oimeha ñande ykére, ha nañanderejarei mo’ãiha mba’eveichavérõ.

Mba’etekópa che irũ ha nde che reindy. Ejeroviápa nde Hesu nembopyapy ha
nemombaretetaha ehasa haguã heta mba’e vai pa’ũ rupi, nde reity’ỹre yvytu atã, nde
rapy’ỹre tata piriri ha nde raha’ỹre rraudal kakua ohasáva nde ykére. Jajesaupi aipóramo
Hesúre jeroviapópe ha jajepokã hese oguahẽvove ára vai ñande rekovépe.

Pa’i Alberto Luna.