Ñahendu Hesu Ñe’ẽ. Jueves 25º Durante el Año

Escucha el evangelio y la reflexión en: https://youtu.be/jr6ukcWZy1g

Jueves 25º Durante el Año Lucas 9, 7 – 9

Upérõ Rréi Herodes ohendu opa umi mba’e ojehúva, ha ndoikuaái mba’épa ojapóta. Oĩ niko he’íva Juan Bautista oikove jey hague. Oĩ katu he’íva ouha proféta Elías, térã peteĩva umi proféta yma guare oikove jey hague.

Herodes he’i: — Chete vaekue niko upe oñakã’ouka va’ekue Juánpe. Mávaiko péicharõ kóva. Maymávante niko imandu’a hese.
Ha Herodes oheka mba’éichapa oúne oikuaa Jesúspe.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Ko ñane retãme niko jahasa va’ekue, nda areiete gueteri, 35 año rasa peteĩ mburuvicha poguýpe. Upe oñehenóiva “dictadura” niko heta jehasa asy ogueru va’ekue heta tapichápe. Peteĩ mburuvicha oñembojára, oñemomba’e ha orekopa opa mba’e ha opavavépe ipoguýpe. Ndohejái oiko mba’eve ndaha’éi ramo hese guáva umi ojapóva.

Oikuaapase upe oikóva ha ohape joko oiméramo ambue tapicha, grupo, térã partido omýi ombyaty hapichakuérape. Oreko ipyrague ojaguáva hapicháre, omombe’úva ichupe mba’épa oiko. Ha upéicha umi ndoikéiva iguatápe térã opu’ãva hese ohopa préso, ojejuka. Oĩ
ndojekuaavéiva ichugui mba’eve, umi “desaparecido” oñehenóiva. Oĩ avei heta oñeñembosaráiva hese, tortúra guýpe ohasa vaekue omanomeve ha heta oĩ opyta vaipáva jehasa asy kuére…

Herodes niko upe mburuvicha omyaka va’ekue Galiléa Jesús oikóramo guare upérupi. Ha’e voi upe ojukauka va’ekue Juan Bautista pe. Oñakã’ouka ichupe, he’i haguére ichupe hembiapo vaiha. Juan Bautista ndokyhyjéi va’ekue he’i haguã mburuvichápe hembiapo vai ha upévare oho kárcelpe ha ojejuka.

San Lucas omombe’u ñandéve Jesús ñe’ẽ ha hembiapo herakuãha ha ojekuaaha opárupi ha Herodes ohendu hague upéva. Orekóne avei ha’e la ipyrague omombe’úva ichupe, ojaguáva Jesús re. Ha Herodes ohechase ha ohenduse ichupe. Ndaha’éi katuete oguata haguã hendive, iñe’ẽ rendu haguã ichupe.

Ohechase peteĩ milagro, oipota ohovasa ichupe hembiapokue. Ha’ete ku ojedivertise ha oiporuséva opa Ñandejárape. Jesús katu oñemomombyrýnte ichugui. Ndoikéi ikuárape ha ndojepopetéi ete voi ichupe. Ñama’ẽmína che reindy ha nde che irũ, mba’éichapa ñande jaiko umi mburuvicha pokarẽ ndive, hembiapo vai ha ombohasa asýva ñande rapichakuérape.

Pa’i Jasy.