Ñahendu Hesu Ñe’ẽ. San Mateo ára Mateo

Escucha el evangelio y la reflexión en: https://youtu.be/OIwiZObGFRE

21 setiembre: San Mateo ára Mateo 9, 9 – 13

Upérõ, Jesús oguata jave ohóvo, ohecha Mateópe oguapýva hína impuésto ojekovrahápe. Ha’e niko okovra impuésto Róma peg̃uarã. Jesús he’i chupe:— Eju che moirũ. Mateo opu’ã ha oho hendive.

Upéi, Jesús oguapy jave mesápe, Mateo rógape, ou avei oguapy hendivekuéra umi impuésto okovráva Róma peg̃uarã. Ijaty avei hendivekuéra heta herakuã vaíva. Umi Fariséo ohechávo upéva he’i Jesús disípulokuérape: — Mba’éicha piko pene mbo’ehára
oguapýta okaru impuésto kovraha ha herakuã vaíva ndive.

Jesús ohendúvo upéva, he’i chupekuéra: — Hesãiva niko noikotevẽi médico, hasývante. Tapeho peikuaa raẽ mba’épa Ñandejára he’ise raka’e iñe’ẽme ku he’írõ guáre: “Che aipota peiporiahuvereko pende rapichápe, pene ofrénda pegueru rangue chéve.”
Che niko ndajúi ahenóivo imarangatúvape, pecadórpente.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ndaha’éi niko oimeraẽvape ñamoguahẽva ñande rógape, ajépa. Ñakonvida niko okaru haguã ñanendive umi jahayhúva ha jaikuaáva, jajeroviáva rehegua. Ñame’ẽ ichupekuéra pe iporãvéva jarekomívagui, ñambojerovia ovy’a haguãicha ñande apytépe ha imandu’a porã haguãicha ñande rehe.

Ko árape ñanemandu’a hína San Mateo apóstol rehe. Omoguahẽ va’ekue Jesús pe hógape. Jesús niko ojuhu vaekue Mateo pe hembiapópe. Impuésto okovra jave hapichápe Roma peguarã. Ndaha’éi vaekue niko péva peteĩ tembiapo ojehecha porãva.

Umi romano niko ndojehayhúi va’ekue Jesús tiémpope. Ha’ekuéra niko mbaretépe okovra impuésto tetã Israel guápe. Naiporãi niko jaipe’a pláta ñande rapichágui ñame’ẽ haguã upéi umi ñande reko vaívape. “Corrupción” ningo la Mateo rembiapo kuri.

Jesús katu niko ohechávo Mateo pe oimeha upe tembiapo vaípe oiporiahuvereko ichupe ha onohẽ haguã upégui oñandu ikatuha oraha hendive iñirũrã. Ha opoi ichupe upe pinda. Ha mitã Mateo niko, oikuaa pype oimeha pe huguaitépe, oñandu Ñandejára opoiha ichupe peteĩ pióla oñeprende ha osẽ haguã tujukuágui.

Ha upepete oñemosã Jesús re. Ha he’ipávo ichupe “eju chemoirũ”, opóma voi opu’ã ha ohejapa imesápe umi kuatia kuéra ha ohoite Jesús ndive. Oraha ichupe hógape. Okaru hendive ha upete guive, hekove opa peve, oiko ichugui apóstol, Jesús irũ.

Mba’épa che irũ ha che reindy umi ndéve nemosã ha neapytĩva Mateo pe omosã haguéicha. Oimépa neño ndaikatu mo’ãi esẽ upégui -Mateoicha avei ndaikatúi va’ekue osẽ ijehegui- ha eikotevẽ avei eñemosã Jesús re, eñemosã nde rapichakuéra rehe oguatáva Jesús ndive. Mateo oñemoirũ haguéicha umi Jesús ndive oguatáva rehe.

Pa’i Alberto Luna.