Ñahendu Hesu Ñe’ê. Jueves de la octava de Pascua

Escucha el evangelio y la reflexión en: https://youtu.be/hdTWd1YuUqk

Jueves de la octava de Pascua

Lucas 24, 35 – 48.

Upérõ umi mokõi Jesús disípulo ou jey va’ekue Emaúsgui Jerusalénpe, omombe’u
mba’épa ojehu chupe kuéra Emaús rapére, ha mba’éichapa oikuaa hikuái Jesúspe pan
omboja’óvo.

Jesús disípulo kuéra oñe’ẽ jave hína umi mba’e chupe kuéra ojehu vaekuére, oñemoĩ
sapy’a imbytépe kuéra Jesús. Omomaitei chupe kuéra ha he’i:

— Py’a guapy agueru peẽme.

Ha’ekuéra katu tuicha oñemondýi. Oimo’ã hikuái poraha. Jesús katu he’i chupekuéra: — Mba’éreiko peñemondýi. Mba’éreiko ndaperoviaséi aikove jeyha. Pema’ẽ che po ha che pýre. Pepoko ha pemaña porãna che rehe. Che niko hína. Póra niko ndaho’ói ha na’ikanguéi.

Péicha he’ívo ohechauka chupe kuéra ipo ha ipy. Ha ovy’a ha ohecha ramo itereígui
ndogueroviapái hikuái. Upémarõ Jesús he’i chupe kuéra: — Perekóiko ja’umi va’erã.

Ha ome’ẽ chupe hikuái pira mbichy pehẽngue, ha Jesús ho’u henondépekuéra. Upéi
katu he’i: — Pe chéve ojehu va’ekue niko hína pe ha’e vaekue peẽme aimérõ gueteri pene
ndive: oiko vaerãha che rehe opa umi mba’e oĩva kuatiáre, Moisés léipe, profétakuérape
ha Salmo kuérape avei.

Upépe omyesakã chupe kuéra pe Ñandejára Ñe’ẽ, ha he’i: — Ñandejára Ñe’ẽme niko he’i voi pe Mesías omano va’erã ha oikove jey vaerãha mbohapy ára haguépe. He’i ave opa tetã rupi oiko vaerãha che rehe mandu’a, maymáva ojevy haguã Ñandejára gotyo, ikatu haguãicha ha’e oheja rei opavavépe hembiapo vaikue. Peñepyrũ vaerã Jerusalénpe voi pemombe’u opa ko’ã mba’e pehecháva. Che amboúta peẽme pe che Ru he’i va’ekue omboutaha peẽme.

Pepytamivéta Jerusalénpe ou peve peẽme pe py’a guasu oúva yvágagui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jakyhyje niko sapy’ánte ñamombe’u haguã ñande jerovia, ñañe’ẽ haguã Ñandejárare hénte renondépe, pe ñande jerovia oiko ñembotypy ñande rógape ha tupaópe ñaime javénte. Pe kyhyje ñanemosã, ñatĩgui ñanemokirirĩ.

Hesu oikove jevy rire oike idisípulo kuéra apytépe, oñembotypáva kyhyjégui. He’i chupekuéra anive haguã okyhyje, ogueru py’aguapy ha ojokuái chupekuéra osẽ haguã omombe’u iñe’ẽ opavave renondépe, he’i omboutaha Tupã Espíritu, ome’ẽtava ñandéve kyre’ỹ ha pu’aka ñañe’ẽ haguã Hesu rérape opavavépe ñati’ỹre.

Mba’erãpa reñandu che reindy, ha nde che irũ, reikotevẽha pe py’aguasu oúva Ñandejáragui. Mba’épepa reikotevẽve hína upe pu’aka mbarete ikatúva omyendy nde py’ápe kyre’ỹ emboguata haguã Ñandejára rérape nde rekove.

Pa’i Alberto Luna.