Ñahendu Hesu Ñe’ê. María Reina ára

Escucha el evangelio y la reflexión en: https://youtu.be/97aWoOLxPrg

María Reina ára Lucas 1, 26 – 38

Ha 6 mése haguépe, Ñandejára omondo ánhel Graviélpe Nazarétpe, opytáva Galiléape.   María, peteĩ kuñataĩ marã’ỹ, oikómiva upépe. Ha’e niko ome’ẽma va’ekue iñe’ẽ omenda haguã Josére. José niko David ñemoñare va’ekue. Ñandejára ángel oike pe María oĩháme ha he’i chupe: — Maitei María. Ñandejára nderovasa. Ñandejára oĩ ne ndive.

  María oñemondýi opytávo. Ha oikuaase mba’épa he’iséne pe maitei upéva.  Ñandejára ánhel he’i chupe:— Ani rekyhyje María. Ñandejára niko tuicha nde rovasa. Nde rye guasúta hína, ha ne membýta. Rembohérata pe mitã Jesús. 

Pe mitã tuicha mba’éta hína, ha oje’éta hese: “Ñandejára Yvatetegua Ra’y”. Ha Ñandejára omoĩngóta chupe rréi ramo, ijypykue Davídcha.   Ha’e oisãmbyhýta hetã Israel opa árape guarã.

 María oporandu Ñandejára ánhelpe: — Mba’éichata piko péicha, ko che ne’ĩrava amenda.

 Ñandejára ánhel katu he’i chupe: — Espíritu Santo rupíta hína péva. Ñandejára Yvatetegua ne añuãta ipokatúpe. Upévare, pe mitã hérata Ñandejára Ra’y Marangatu. Ha ne príma Isabel imembýta hína avei, iguãiguĩma ramo jepe. Ku oje’e va’ekue ndaikatuiha imemby, ojapóma hína 6 mése hye guasuha. Ñandejárape guarã niko ndaipóri ikatu’ỹva.

  Upépe María osẽ he’i: — Che niko Ñandejára rembiguaimínte. Tojapo che rehe pe ere háicha. Ha Ñandejára ánhel oho.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ñande niko ñane retãme ndajarekói Rréi ha Rréina, ambue tetã oreko háicha yma guive ha oime katu orekóva ko’ágãite peve. Oime jepe niko pe purahéi “Che La Rréina” ojapo vaekue Emiliano R. Fernández, ohenói hápe La Rréina upe ohayhuetévape. Ha ojeporavo jepi avei mitãkuña nguéra apytépe umi iporã porãvéva oiko haguã La Rréina ramo. Aipóramo niko ñandéve guarã La Rréina hína umi ojehayhu ha oñemomorãvéva.

 Ko árape ñanemandu’a hína ñande sy Tupãsy María Rréina ára. Ha’e jepe ningo ndaha’éi hína umi kuñakarai guasu omandáva rehegua. Jepevéramo pe Ánhel oúva hendápe he’i ichupe imemby Hesúgui Ñandejára ojapotaha Rréi Davi rekovia, María ndojejapói upe haguére ha he’i ijehe Ñandejára rembiguaiminteha.

Ñande sy Tupãsy niko ñandéve guarã ha’éta hína pe La Rréina ojehayhu ha oñemomorãva. Ha’e hína la iguapyha noiméi palacio kuéra ojajaipávape. Ha’e ningo oguapy imemby ikére pe pesebre vaka kehápe, upéi pueblito Nazarépe, omoirũvo imemby Galilea rupi, ha ipahápe oñembo’ývo pe imemby kurusu renondépe.

Mba’éichapa reñandu che reindy ha nde che irũ Tupãsy Maríape nde rekovépe. Ehayhúpa ha emomorã. Erénepa ichupe Che La Rréina.

Pa’i Jasy.