Ñahendu Jesús. Domingo 20º Durante el Año

Escucha el evangelio y la reflexión en: https://youtu.be/mC0a05EgHP4

Domingo 20 Durante el Año Ciclo C. Lucas 12, 49-53

Upérõ Jesús he’i idisípulokuérape: Tata amyendy haguã niko aju ko yvy ári. Ha nga’u ra’e hendýma katu hína. Che katu niko añemongarai va’erã ágã upe tatápe, ha upéva oguahẽ aja che angapyhy.

Peẽ piko peimo’ã aju hague arúvo py’aguapy ko yvy ári. Ndaupéichai hína. Aju arúvo joavy. Peteĩ ógape oikohápe cinco, mbohapy opu’ãne mokõire. Túva ha ta’ýra opu’ãne ojuehe. Sy ha imemby opu’ãne ojuehe. Ména sy opu’ãne imemby rembirekóre, ha ha’e opu’ãne iména sýre.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

“Anive ñañorairõ, anive jaiko vai, torýpe ñamba’apo taimbarete ñande Paraguay”. He’i ningo peteĩ purahéi. Ha ajépa ningo hi’ãite ñandéve anivéma añete jaiko vai ha ñañorairõ. Hi’ãite añete jaiko tory ha joayhúpe. Jaikuaa jepe ningo avei ndaha’éi la jaiko porã meméva. Oĩ jajuavyha, nañasẽigui petei ñe’ẽme. Ha upéva oiko jepi ñande rógape, ñande vecinokuéra ndive, ñande familia, ha ojepyso upérupi.
Ñahendúramo Ñandejára ñe’ẽ ha jaháramo tupaópe katu ningo jaheka py’aguapy.

Ha ñahendúramo Jesús he’iha ndoúi hague oguerúvo py’aguapy, ou ndaje ñanembojuavy haguã. Péa ñanembokuchu nunga. Mba’e polítika pío péa. Mba’éiko péa, ja’e.

Oiméne ko pe tata Jesús oguerúva ñandéve hína pe Espíritu Santo rata, omyendýva ñande rekovépe umi mba’e porã Ñandejáragui oúva, ha upe jave avei ohapýva Aña rembiapo kuéra. Ha upépe oĩ hína la pa’ã. Pe Aña niko noñembojarúi hína ta’u nde ra’y.

Ha’e noñembojarúi ete hína. Guerra ite la idelihéncia. Ndoheja rei mo’ãi hína Jesús pe ojavyky ha oipe’ase gua’u ichugui umi hese guáva.
Jesús oúramo jepe py’aguapýpe, añeteguáva he’i, oipytyvõ oikotevẽvape ha imba’e porã opavave ndive, pe Aña ndaupéichai. Ha’e mbaretépe oike, hova atã, ijapu, imonda ha ohasa hapicha akã ári.

Ndoikuaaséi mba’eve. Ha upépe hendýma la ñande rekovemi jaikoséramo Ñandejára rapére Jesús ndive. Ndajaháiramo jepe ñañorairõ avave ndive, jaikuaa vaerã oĩtaha ndogustáiva, ñanderape jokoséva, ipochýva jepe ñanendive. Ñande rógape voi oĩta.

Jesús ningo ñande avisánte, ndaha’éi ñande ñane bochinchero haguére la jaiko vaíta, térã katu Ñandejára oipotágui mba’e jaiko vai ñande rapicha ndive.

Mba’etekópa che irũ ha che reindy la nde espíritu hína, eike haguã nde avei ko ñorairõme. Reñanimápa térãpa ipohýi etereíma ndéveramo guarã.

ÑAÑEMBO’E OÑONDIVE

Ñandejára Jesucristo, emyendy ore pype Espíritu Santo pu’aka mbarete, ani haguã ore kangy ha rokyhyje Aña rymba kuéragui, oñorairõva ore ndive ára ha pyhare. Nendive uvéi taorepu’aka hese kuéra. Amén.

Pa’i Jasy.