Ñahendu Hesu Ñe’ê. Martes 03 de Diciembre

Escucha la reflexión en:  https://youtu.be/ULmsgJhemac

Lucas 10, 21 – 24

Umi 72 disípulo ou jey vove,Jesús henyhẽ sapy’a vy’águi oúva Espíritu Sántogui. Ha he’i:Romomba’e guasu che Ru. Yvága ha yvy niko ne mba’e. Romomba’e guasu reñomi haguére ko’ã mba’e umi iñarandu ha imba’e kuaávagui, ha reikuaauka umi heko mirĩ ha iñarandu’ỹvape. Upéicha voi che Ru nde reipota vaekue ojehu.

Upéi Jesús ojere he’i opavavépe: “Che Ru niko omoĩ che pópe opaite mba’e. Avave ndoikuaái Ñandejára Ra’ýpe, Túva añónte. Ha avave ndoikuaái Túvape, Ñandejára Ra’y añónte, ha umi ojekuaaukávape Ñandejára Ra’y.

Ha ojerévo idisípulo kuéra gotyo, he’i chupe kuéra año: “Ovy’aite vaerãnepa umi ohecháva ko peẽ pehecháva hína ko’ágã. Añetéko ha’e peẽme, heta proféta ha rréi hamba’e ohechase ha ohenduse vaekue ko peẽ pehecháva hína. Chupe kuéra katu nda’ijái vaekue ohecha térã ohendu.”

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE

Ñama’ẽramo ñande tupaópe, ñande capílla, grupo kuéra, há jahecháramo máva omomýi tembiapo, catequesis, ñembo’e, celebración, fiesta patronal, coro, há opaichagua oñemboguatáva comunidápe, jahecháta umi omyakãva apytépe sa’i oĩme iñarandu há ipláta hetáva, sa’i oĩ ijestudio pukúva. Umi jahechavéva ãichagua tembiapópe niko tapicha noñemomba’e guasúiva, kuñakarai ha karai opaichaguáva.

Ha upévare ningo oĩ he’íva: Mba’eíko karai huláno, che rapicha tavy, cheichaguávante avei oúta oñemoñe’ẽkuaase gua’u chéve hina ko’ápe, mba’épiko che mbo’éta kóva, ko che aikuaa porãva chúpe. Toúna pa’i, toúna hermana, toúna peteĩ ijestudio miéva, peteĩ oleéva, iñarandúva, ñahendu haguã ikuentamíva.

Hesu niko ha’e vaekue avei kuimba’e opaichaguáva, mboriahu omba’apóva ohupyty haguã ára ko’ẽre oikotevẽva. Ndaha’éi va’ekue karai guasu, ijestúdio hetáva, oúva tava guasúgui, Ña María membýnteko ha’e, ha karai José ra’y, mba’apohárava avei, opavave oikuaáva ivállepe mba’eichaguápa.

Ha Hesu niko oñemoirũ avei kuimba’e ha’eichaguáva rehe, apostol kuéra niko mba’apohára meme vaekue. Umi omyakã vaekue ñande Iglésia ijypýpe niko Pedro, Juan ha Santiago, omba’apóva raka’e ikanóape peskáda hápe. 

Eguatána che irũ ha nde che reindy, umi Hesu oiporavo ha ojokuái vaekue ningo ndeichaguánte avei. Ha ehechamína mba’éichapa umíva ovy’a joa oúvo, ha Hesúma katu ovy’a hendive kuéra, ipy’aite guive oguerohory Tupãme ndoiporavói haguére karai guasu arandúpe ojevale haguã hese kuéra, upéva rangue oiporavo umi opaichaguáva. Anietéke nde upéicharõ etĩ téra ekyhyje mba’e eiko haguã Hesu ykére. Ha’e ikatu porã hína nerenói ha ojevale avei nde rehe.

Pa’i Alberto Luna.