Ñahendu Hesu Ñe’ê. Miércoles 04 de Diciembre

Escucha la reflexión en:  https://youtu.be/Pzb3bcaQwyM

Mateo 15, 29 – 37

Jesús osẽ ha oho mar Galilea
rembe’ýpe. Ojupi peteĩ sérrope ha upépe oguapy. Ha heta umi oguahẽva hendápe,
ogueraháva hendive kuéra umi ikarẽva, ohecha’ỹva, iñe’ẽngúva, paralítiko ha
opaichagua hasývape. Umívape omoĩ joa hikuái Jesús renondépe, ha ha’e omonguera
chupekuéra. Ha opavave ohecha ramoite mba’éichapa umi iñe’ẽngúva oñe’ẽ jevy,
paralítiko okuera, ikarẽva oguata porã, ha ohecha’ỹva ohecha jevy. Ha oñepyrũ
omomba’e guasu hikuái Israel Tupãme.

Jesús ohenói idisípulo kuérape, ha he’i chupekuéra:

Aiporiahuvereko
niko ko’ãvape.
Ojapóma niko mbohapy ára oĩha ko’ápe che ndive, ha ndoguereko véima mba’eve ho’u vaerã. Namondoséi hógape ñembyahýire, ani
ágã tapére ipy’a mano mba’e.

Hemimbo’e kuéra katu he’i chupe:
Mba’éicha piko jajuhúta tembi’u ñamongaru haguã opavavépe. Ko’a rupi niko
ndaipóri avave oikóva.

Jesús oporandu chupe kuéra: Mbovy pan piko pereko?

Ha’e kuéra he’i chupe: 7, ha pira mbovymi.

Upépe Jesús omboguapy yvýpe
opavavépe, ha ohupi ipópe umi 7 pan ha umi pira, ha oñembo’e Tupãme ohovasa
haguã. Upéi omboja’o umi pan ha ome’ẽ hemimbo’e kuérape, ha ha’ekuéra ome’ẽ
opavavépe. Ha okaru hikuái hyvatã meve. Ha umi hembýva ombyaty 7 ajaka renyhẽ.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Jahecha hetáma oime ohóva
Caacupépe, oñemboja Tupãsy rógare, oraha upépe iñembo’e, hemikotevẽ, imba’e
jerure ñande sýpe. Opaichagua ko oĩ oñembojáva, oĩ mitã, mitã rusu, karai,
kuñakarai, oime itujáva ha iguaiguĩva. Oĩ mboriahu ha oime oreko miéva, oime
campesino, indígena, kampañagua, siudagua avei ohóva.

Upéicha avei jahecha ohoha heta tapicha opáguio Hesu rendápe, oñepohano haguã imba’asy kuéragui. Hesu oiporiahuvereko chupe kuéra ohecha kuaágui imboriahuha hikuái, sa’i orekoha tembi’u, ndopoiséi chugui kuéra péichante, ani ãga tapére ipy’a mano mba’e ñembyahýigui. Ha he’i apóstol kuérape ome’ẽ haguã chupekuéra upe orekóva, omboja’o haguã michĩramo jepe, ani hakate’ỹ, ani oñembotavy hapicha mboriahu remikotevẽgui.

Ema’ẽmína che irũ ha nde che reindy, heta iterei niko umi oikotevẽva ojerepáva ñande
rehe, mamo piko nde ikatúta esolusionamba ichupe kuéra iproblema. Hesu ningo
ndosolusionambái avei, ha’e ningo oipotánte eñandu nde avei upe ha’e oñandu
háicha, ehecha kuaa avei nde rapicha mboriahu remikotevẽ, emboja’o upe
Ñandejára grásia erekomívagui ikatu haguãicha ohupyty opavavépe, ha’e ojapo
haguéicha. 

Pa’i Alberto Luna.