Ñahendu Hesu Ñe’ê. Jueves 05 de Diciembre

Escucha la reflexión en: https://youtu.be/pbD7fspuIHI

Mateo 7, 21. 24 – 27

Jesús he’i opavavépe: ‘Ndaha’éikohina umi chéve he’íva: “Ñandejára, Ñandejára”, umi oikétava yvágape, Tupã Rréino pe. Umi ojapóva che Ru yvágape oĩva rembipotánte oikéta.

Upévare, pe ohendúva che ñe’ẽ ha ojapóva upe ha’éva, ojogua petei kuimba’eiñakã porãvape hogarã omopu’ã vaekue ita ári. Upéi ou oky ha okakuaa umi rraudal. Yvytu hatã oipeju ha ojejapipa pe ógare.

Péicharõ jepe ndo’ái, oñemboguapýgui ita ári. Pe che rendúva ha ndojapóiva che ha’éva katu, ojogua ku tekove tavýpe, omopu’ãva’ekue hogarã yvyku’i ári. Upéi ou oky ha okakuaa umi rraudal. Yvytu hatã oipeju ha ojejapipa pe ógare ha sarambikuépe ho’a, oñembyaipaite’.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Heta niko ñaime jaiporúva Ñandejára réra, ñahenói ha ñanemandu’áva hese opa ára, jajovasa jahasa kuévo tupao renondépe, ñañembo’e jake haguã, oĩ katu omoĩva ijajúri kurusu, ha jahecha avei rosário térã medalla omoĩva. Ñande rógape jareko Hesu, Tupãsy, sánto kuéra ra’anga ñamyataindýva. Jaháva Caacupépe, jaguata, jajapo promesa, ñaguahẽ upépe ñañembo’e, oĩ oñemombe’u ha okomulgáva, ha oguerúva ijehe Caacupe poty mandu’arã.

Ñaime heta ñande karaíva, ñande primera comunión, confirmación, oĩ avei omenda tupaóva. Ha oime avei he’íva: Che ajapopáma umíva, ko’ãga apytu’úma, areko paitéma kuatia tupaogua areko vaerã.

Ñande obispo kuéra ijaty vaekue Aparecida, Brasílpe áño 2007 pe, he’i ñande cristiano ha’eha Hesu remimbo’e ha hembijokuái, “discípulos y misioneros de Cristo”. Heta cristiano ko opyta pe temimbo’épente, ohendu, oñehekombo’e, oikuaápa, ohupytypa. Ha upéi ojejokuáita vove okañy, ndojekuaavéi tupaóre, ndohejái Ñandejára ojevale hese kuéra.

Hesu he’i ñandéve ndaha’éi hina pe jejopy ha ñeikotevẽme ñahenói haguére Ñandejára rérante jaikétaha hendive yvágape. Tekotevẽ ñamboguata ñande rekovépe ha ñamomba’apo ñande jerovia jaiko hárupi. Ani oso ñande guata Ñandejára ndive. Ñamoañete tembiapo rupive upe jaroviáva ñembo’épe ha tupaópe ñande rógape, ñamba’apo hápe ha opárupi.

Mba’etekópa che irũ ha nde che reindy. Ndépa hína umi reguapy, rehendu ha  rema’ẽva reheguánte. Térãpa nde jeheguimi avei. Eguatápa eheka nde rapicha reha’arõ’ỹre ojejerure ndéve. Ndépa ndedeprovechomi nde komunidápe térapa mombyrymíguinte rema’ẽ. Ikatúpa Ñandejára ojevale nde rehe terãpa mba’e ere.  Epensamína kóvare.

Pa’i Alberto Luna.