Ñahendu Hesu Ñe’ê. Viernes 06 de Diciembre

Escucha la reflexión en: https://youtu.be/eQJFatAkZ8Q

Mateo 9, 27 – 31.

Jesús ohasa jave ohóvo osẽ hapykuéri mokõi ohecha’ỹva, osapukáiva chupe:
Ore poriahuverekomína, nde David ra’y!
Ha oike rire Jesús hógape, oguahẽ hendápe umi ohecha’ỹva. Ha Jesús oporandu chupe
kuéra: Peroviápa che ikatuha pomonguera.
Ha’e kuéra he’i chupe: Roguerovia ore Jára.
Upévo Jesús opoko umi hesáre, ha he’i: Toiko upe peẽ perovia haguéicha.
Ha okuera umi hesa ha ohecha porã jevy. Jesús he’i jey-jey chupekuéra:
Aníke avave oikuaa kóva.
Ha’e kuéra katu, osẽmi vovénte upégui, opa rupi omombe’u upe Jesús ojapo vaekue
hese kuéra.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…
Heta niko oikóva Ñandejára rapykuéri ha tupaópe jahecháva opa ára, oike grúpope, ñembo’épe, oĩ opurahéiva córope, oime katu oikóva catequísta ramo, animador, celebrador, diácono, jahecháva oguata comunidápe hapichakuéra ndive.
Ha upéi katu corrida pukúpe, jahecháma oĩha oguapýva tape yképe, okúiva hakãgui ha opytáva, ndoguatavéiva, ikane’õ, ikangy, oho pokã pokã ha upéi katu ndohoveietéma voi. Ojeheja upe tupao jeguatágui.

Oguahẽva voínte niko ñande rekovépe upe kane’õ. Ipohýi ñandéve ñande guata, ñande pytupa vaicha, ha ndajaguatasevéi. Ñande kuerái ha japoise upe jajapóvagui. Ja’e ñande jupe: oiméne kóva ndaha’éi che mba’erã mba’e, tajeheja mba’e ichugui.

Ko’ápe jahecha mokõi tapicha ohecha’ỹva, ojeruréva Hesúpe oipytyvõ haguã chupekuéra. Ha’e katu ohasánte ijykére kuéra ha nopenái vaicha hese kuéra. Ha’ekuéra pytumbýpe opyta. Upéicha avei ho’avove ñande rehe ára pohýi ha pytũ, ha’eteku Ñandejára nañanerendúiva, nopenáiva ñande rehe, ha ñande katu upépe ñande tarovátama ñaína.
Omombe’u ñandéve San Mateo, mba’éichapa ko’ã mokõi tapicha ohecha’ỹva oho Hesu rapykuéri, ndopoíri chugui, oguahẽ meve hógape oho ombota hokẽ ha oheka chupe. Hesu upémaramo oporandu chupe kuéra ojeroviápa hese añete. Ha’e kuéra he’i ojeroviaha, ha jahecháma niko upéichaha, ajépa. Upéicha’ỹ rire niko ojevýma va’erã mo’ã ha opyta jey tape yképe.
Mba’etekópa hína upe nde jerovia che irũ ha nde che reindy. Oimépa remuña upe reroviáva rehecha’ỹ ramo jepe. Ehekápa Ñandejárape terãpa epyta tape yképe.
Oimépa reguata gueteri hapykuéri. Reñemohatãpa nde líño ha nde rape’ípe. Hesu ningo
he’i: “Toiko upe perovia haguéicha” Tuicha mba’e upe jerovia, aje. Ñanemboguatáva
jahupyty peve upe ñaha’arõ ha jaipotaitéva.

Pa’i Jasy.