Ñahendu Hesu Ñe’ê. Domingo 08 de Diciembre

Escucha la reflexión en:

Lucas 1, 26 – 38

Ha 6 mése haguépe, Tupã omondo Ánhel Graviélpe peteĩ pueblo Galilea pegua hérava Nazarétpe. Upépe oiko Maria, peteĩ kuñataĩ marã’ỹ, ome’ẽma vaekue iñe’ẽ omenda haguã Josére, Rréi David ñemoñare.

Upe Ánhel oike María oĩháme ha he’i chupe: – Roguerohory, nde Tupã rembiporavo! Ñandejára oĩ ne ndive. María oñemondýi ha opensa mba’énepa he’ise pe maitei ohendúva. Pe Ánhel he’i chupe: – Ani rekyhyje, Maria, Tupã nde rerohory. Nde rye guasúta ha ne membýta, ha pe mitã rembohérata Jesús. Ha’e mba’e guasúta ha oje’éta hese: “Tupã Yvatetegua Ra’y”. Ha Tupã Ñandejára ojapóta chugui mburuvicha guasu, Rrey Davídcha. Ha’e oisãmbyhýta Israel retã guápe opa ára guarã.

María oporandu pe Ánhel pe: – Mba’éicha piko ojehúta upéva, ko che ndaikóiva
gueteri kuimba’e ndive?

Pe Ánhel katu he’i chupe: – Espíritu Santo oikéta nde pype, ha Tupã Yvatetegua pu’aka oúta nde ári. Upévare, pe mitã oútava oñembohérata Imarangatúva ha Tupã Ra’y.

Isabel, nde rogaguáva, imembýta avei, iguãiguĩma ramo jepe. Pe kuña oje’e vaekue
ndaikatuiha imemby, ojapóma 6 mése hye guasuha. Tupãme guarã ndaipóri ikatu’ỹva.
Aipórõ María he’i: – Che, Ñandejára rembiguái. Tupã tojapo che rehe pe ere
haguéicha. Ha uperire, pe Ánhel oho.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ajépa ñambyasy ha ñane ko’õ pe ñane génte ndou véirõ ñande rógape, nañamoguahẽporãi haguére ichupe, nañapenái haguére hese pe oikotevẽ aja. Heta vése ñande ñane aiguĩvéva tupaógui, ñande tupaogua, pa’i, hermana, obispo, catequista, seminarista, cordinador, movimiento, grupo gua, opavavéva jaikóva Ñandejára kokuépe, nañamboguata porãi pe ñane rembiapo, nañañatende porãi pe ñande rapicháre, ndajaikói heseve kuéra pe hemikotevẽ ojerure háicha, vai vaínte jajapo pe ñane misión.

Ou haguéicha Tupasỹ rendápe, Ñandejára ou ko’ãga ñane rendápe ha ojevalese ñande rehe, ñane renói ñande réra rúpi. He’i ñandéve che ra’y, che rajy, ema’ẽmína mba’éichapa oĩ ko iglesia católica Paraguáipe, aikotevẽ nde rehe ñambyaty haguã umi isarambipávape.

Oiméramo ñane mondýi ko ñehenói, Ñandejára he’íne ñandéve he’i haguéicha ñande sy tupãsyme: “Ani rekyhyje” Jesús heñóita ne korasõme, ha’e oĩta nde
pype, ha’e oguatáta nendive.

Ñama’ẽro ñande jehe ikatu ñande py’a mirĩ terã ndajajeroviapái.“Tupãme guarã
ndaipóri ikatu’ỹva”, ohendu ñande sy ou ramo guare hendápe pe ánhel Graviel, ha
uperõ umi kyhyje ogue ichugui.

Hi’ãite vaerãpa che iru ha che reindy, nde avei ehendu pe Ñandejára ñehenói
ñande sy porãite asy renondépe, ha tojevale nde rehe Ñandejára, ñamboguata pyahu
hagua ñande Iglesia ha ñamopu’ã haguã peteĩ tetã pyahu.

Pa’i Jasy.