Ñahendu Hesu Ñe’ê. Martes 18 de febrero

Escucha el evangelio y la reflexión en: https://youtu.be/d6ey7ovq6xE

Martes VI Tiempo Ordinario Marcos 8, 14 – 21.

Upérõ Jesús disípulokuéra hesarái ra’e ogueraha haguã hi’upyrã. Pan peteĩ mínte oguereko hikuái pe kanóape. Jesús he’i chupe kuéra: — Peñeñangarekóke umi fariséo ha Herodes levadúragui.

Idisípulokuéra he’i ojupe: — Oime vaerãko péicha he’i ñandéve pan ndajaguerúi haguére.

Jesús katu oikuaapa mba’épa he’i hikuái. Ha osẽ he’i chupe kuéra: — Mba’éreiko peje ha peje ndapeguerúi hague pan. Ndapehechái gueteri piko. Ne’ĩra gueteri piko oike peẽme pene akãme. Pende resa, ha ndapehechái. Pende apysa, ha napehendúi. Na pene mandu’ái nga’u piko amboja’o hague 5 pan 5.000pe guarã. Mboy ajaka renyhẽ piko pembyaty raka’e upérõ umi hembyrégui.

Ha’e kuéra he’i: — 12.

He’i jey chupekuéra Jesús: — Ha piko na pene mandu’ái amboja’órõ guare umi 4.000 rupipe, 7 pan. Mboy ajaka pembyaty upérõ umi hembyrégui.
He’i hikuái: — 7.

Upépe he’i chupe kuéra: — Ne’ĩra gueteri piko oike peẽme pene akãme.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe añarã ningo ndahaéi katuete tuicha tyapúpe oñepyrũva, péva ningo omba’apo ñande rehe ku levadúra omba’apo háicha pe pánpe, michĩmínte tekotevẽ emoinge pype, ha upévante -háime ndojekuaáiramo jepe- ombovupaitéta hina pe mása tuicha háicha.

Térã katu pe kupi’i okaru háicha ñande róga horkón ha vígare, kirirĩhapete okaru hese
ha jahejáramo oho puku ágã ipahápe ndaikatú mo’ãvéima jajoko ha oitýta ñande róga
ñane akã ári hina.

Hesu he’i iñirũ nguérape oñeñangareko haguã fariseo ha Herode levadúragui, ani oike ipype kuéra ohechakuaa’ỹre ha ombyaipa hekove. Herode niko mburuvicha oiporúva pe mbarete orekóva ijupeguarãnte ha nomomba’éiva hapicha rekove jepe ojapo haguã oipotáva, jaikuaa niko ojukauka hague Juan Bautístape.

Ha umi fariseo katu oñeha’ã ojapopaite umi Ñandejára léi ha oimo’ãma ha’ekuérante imba’e porã ha upévare ojeguaru hapicha hembiapo vaívagui. Mokõivéva niko amo ipahápe oapo’i hapichápe ha oñemoĩ hi’ári, oñemoĩ rangue ijykére jeguata jojápe.

Umíva oikéramo ñande py’ápe, ha jahechakuaa ramo ñañembovuha hina ñande rapicha renondépe, nañanepasiénsiai, ndajahechakuaái ñande rapicha ojavývape, ñandénte jaikuaáva ha ja’évante ovale, jahasapa ramo ñande rapicha akã ári jajapo haguã jajaposéva. Cháke péva che irũ ha che reindy, péva ha’éma hina pe kupi’i rape ojekuaáva ñande lómore hina. Ñañepohanóke oitypa mboyve ñande róga ñane akã ári.

Pa’i Alberto Luna.