Ñahendu Hesu Ñe’ê. Miércoles 19 de febrero

Escucha el evangelio y la reflexión en: https://youtu.be/R0zpBlxmJGc

Miércoles VI Tiempo Ordinario Marcos 8, 22 – 26.

Jesús ha idisípulokuéra oguãhẽ Betsáidape, ha ogueraha chupe hikuái peteĩ ohecha’ỹva.
Ojerure chupe hikuái opokomi haguã hese. Jesús ipojái pe ohecha’ỹva póre ha oguenohẽ
chupe táva rokápe. Hendýpe omyakỹ umi hesa, omoĩ ipo hese ha oporandu chupe
ohechámapa. Pe ohecha’ỹva oñepyrũ ohecha ha he’i Jesúspe: — Ahecha oguatáva, ha
ojogua vaicha chéve yvyra mátape.

Upévo, Jesús omoĩ jey ipo umi hesáre. Ha pe kuimba’e oipe’a umi hesa, omaña porã ha
ohecha opa mba’e. Okuera. Upépe, Jesús omondo chupe hógape ha he’i chupe: — Anínte
reike puéblope.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta mba’e niko ñande ndajaikuaái ha ndajahechái, okañy ñande hegui. Ndajarekopái ñande resa renondépe. Ha oime ramo jepe jahecha ñande resa rupi, nañama’ẽi ha nañañandúi Ñandejára ohecha ha oñandu háicha.

Ogueru hikuái Hesúpe peteĩ ohecha’ỹva ha Hesu ipojái hese, ogueraha ha’eño háme hikuái mokõimi. Upépe oñemongeta hendive, omyakỹ hendýpe upe ohecha’ỹva resa, omoĩ ipo iñakã ári, opoko hese ha oñeñanduka ichupe.

Sapy’ánte ñande ñañekonvida jaha haguã retiro hápe, jaike haguã ñañemongeta puku Ñandejára ndive, ñahendu ha ñañamindu’u haguã iñe’ẽre, ñañe’ẽ Hesu ndive, tomoĩ avei ipo ñane akã ári jahechápa ndoipe’ái upe ñane apytu’ũ ha nañanderesape’ái jahecha porãve haguã ñande raperã ha jaguata haguã hápe rupi.

Ha pe tesape’a ningo ndaha’éi pya’e pya’e, ndaha’éi péicha péichante oikóva. Ñañeha’ã va’erã niko ñande jehe ha ñande rapicháre avei, mbeguekatu hesakãve haguã ohóvo ñandéve, japáy ha jahecha porãve haguã pe ñande rekove Ñandejára oipota háicha.

Hesu opoko rire pe ohecha’ỹva rehe niko upe hesa ojepe’a vai vaínte raka’e, ohecháramo
jepe nahesakãmbái upe henondépe oĩva: “Ahecha umi oguatávape, ojogua yvyra hakã ha
hoguévape”, he’i.

Ha upéicha avei ñande, che reindy ha che irũ. Oime ramo jepe Hesu ñande ykére, ndajahecha porãmbái ñande rekove, nahesakãmbái ñandéve ñama’ẽramo ñande rapicháre.

Ha ñaikotevẽ Hesu opoko jevy jevy ñande rehe, oipe’a ñande resa jahecha porã haguã,
ñande py’aite guive ñande rekove ha umi ñande ykére oimévape.

Pa’i Alberto Luna.