Ñahendu Hesu Ñe’ê. Martes 3 de septiembre

Ñahendu Hesu Ñe’ê. Martes 3 de septiembre

                                                           San Lucas 4, 31 – 37

Upérõ Jesús oho Cafarnaúmpe, opytáva Galiléape. Ha pytu’uha árape oñemoĩ oporombo’e.  Ha ohecha ramo joaite hikuái mba’éichapa ombo’e chupe kuéra. Oñe’ẽ niko chupe kuéra karai guasúicha.

 Pe tupaópe oĩ hína ra’e peteĩ kuimba’e orekóva ipype demóño pochy. Upéva hatã osapukái:

 —Nde, Jesús Nazaretgua, mba’éreiko reñemoĩ ore rehe. Reju nga’u piko ore rundívo. Che roikuaa. Nde niko Ñandejára ra’y.

 Jesús katu osẽ oja’o pe demóñope. He’i chupe:

—Eguata ekirirĩ, ha esẽ pe kuimba’égui.

Upépe pe demóño omombo pe kuimba’épe yvýpe, ha osẽ chugui ojapo’ỹre hese mba’eve.  Oñemondyipa joa umi upépe oĩva, ha he’i:

—Mba’eichagua pu’aka guasu mba’éiko kóva oguereko. Oñe’ẽ umi demóñope ha he’i chupe kuéra osẽ haguã, ha ha’e kuéra osẽ. 

 Ha opa rupi herakuã umi mba’e Jesús ojapóva. 

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE…

Umi ñande rapicha oikóva aña ha tie’ỹ pópe, tembiapo vai pa’ũme niko ipochy jepi ja’e ramo chupe kuéra tekotevẽha ojeheja umívagui, ojetyvyro ha ndoipotái oñembovai chupe kuéra hembiapo. Ñañe’ẽramo chupe kuéra Ñandejárare, tupao, jerovia, ha mba’e porãre ojere opuka, oñembohory ñande rehe, ha ñande reja rei. 

Jahecha Hesu ohoha oñe’ẽ ha ombo’e opavavépe. Hesu oñe’ẽ karai guasúicha, ha pe iñe’ẽ oguapy ha oguahẽ umi ichupe iñe’é rendúvape, opáichavo oĩ avei umi iraríva ichugui ha nohenduséiva iñe’ẽ. 

Umi iñañáva oikuaa Hesúpe ha ndoipotái oike ha’e kuéra oĩháme, hakate’ỹ pe imba’évare, ha ndoipotái ojepe’a chugui. Pe aña niko ojogua peteĩ ryguasu kurúpe, ndoipotáiva oñemboja terá ojepoko hupi’áre, ha tuicha okorói ha omboperere ipepo ñane mondýi haguãicha voi, opáichavo jaikuaa porã ndaipu’aka mo’ãiha ñande rehe jajedesidi porãramo jaipe’a haguã ichugui hupi’a ha imemby jepe ra’e. 

Ha upéva niko pe Hesu ojapóva. Ha’e añete oreko pe pu’aka Ñandejáragui oúva, ikatu ohenonde’a pe aña. Ndoguevíri ichugui. Ombohovái ha omosẽ. Ha péicha hína nde che irũ ha che reindy. Ikatúko oime ñande avei ñaikotevẽ hína Hesu oike mbareteve ñande rekovépe ha omosẽ umi aña pochy ñane apytĩva. 

Pa’i Jasy.