Ñahendu Hesu Ñe’ê. Martes 8 de octubre
8 octubre, 2019Ñahendu Hesu Ñe’ê. Jueves 10 de octubre
10 octubre, 2019
Ñahendu Hesu Ñe’ê. Miércoles 9 de octubre
Lucas 11, 1 – 4.
Upe ára Jesús oñembo’epa rire, peteĩ idisípulo oñemboja hendápe. He’i chupe:
— Mbo’ehára, ore mbo’éna mba’éichapa roñembo’e vaerã, ku Juan ombo’e haguéicha idisípulo kuérape. Jesús he’i chupe kuéra: — Peñembo’e jave, peje kóicha:
Ore Ru toñemomba’e nde réra marangatu.
Eju ha eru oréve ne Rréino.
Ára ko’ẽrekena eme’ẽ oréve ore rembi’urã.
Eheja rei oréve ore pekádo,
ore roheja reiháicha opavave ore rehe ojapo vai vaekuépe.
Aníkena rehejátei rojepy’a ra’ã.
Ñandejára Hesukrísto ñe’ẽ.
HA ÑAMBOGUEJY ÑANDE REKOVÉPE…
Oikómiva niko upérupi he’íva mitãme: Néike che memby, néike che rajy, eñembo’éke, terehóke mísa hápe, terehóke tupaópe, katesímo hápe ha mba’e. Ha umicha omokyre’ỹ chupe kuéra ñe’ẽme. Ha upéi katu ha’e kuéra opyta ógape, ndojehechái oñembo’éramo, aipo Biblia ipópe hamba’e ndojekuaáiva, ndohói mísa hápe, térã tupaópe, noiméiramo ihénte mano, térã omendáva, téra katu hunción jave mba’e ohóne ágã mombyrymíguinte oguata prosesiónpe.
Ñahendu angete San Lúka omombe’u ñandéve mba’éichapa Hesu oñembo’e jepi ha umi hemimbo’e kuéra ohecháva chupe mante rei upéicha ojapo, ohecha hikuái Hesu oñemoha’eño jepi ha oho oñe’ẽ puku Túva Ñandejára ndive.
Ha oñandúgui hikuái upégui Hesu onohẽha pe pu’aka ha jerovia mbarete omboguatáva ichupe, oikuaasetéma avei ha’e kuéra mba’éichapa ikatu vaerã ojapo upéva. Ha ohóma katu ojerure ichupe ombo’e haguã chupe kuéra mba’éichapa oñembo’e vaerã Ñandejárape.
Oĩ ningo he’íva oikuaa ha orekoha ñembo’e ipoderósova, ha’e mante oikuaáva ha ndaikatúiva omombe’u avavépe. Hesu nahakate’ỹi upe ñembo’e ha’e oikuaáva rehe, noñongatúi ijupe guarãnte ha ombo’e idisípulo kuérape, ha ñanembo’e ñandéve ave mba’éichapa ñañe’ẽ vaerã Ñandejára ndive, ñati’ỹre ha jakyhyje’ỹre ichugui.
Ikatúko hína pe mba’e guasuve Hesu ñanembo’éva ko ñembo’e rupive ha’e hína ikatuha ñañemboja ñañemongeta Ñandejára ndive ñande ru térã ñande sy rendápe jaha ramo guáicha, ñañe’ẽ ichupe ñande rógape ñaiméramo guáicha hendive, ñandekuaa porã, ñande rayhúva ha ome’ẽneha ñandéve opa mba’e porã. Reñemongetápa che reindy ha nde che irũ, Ñandejára ndive, nde ru térã nde sy ramo guáicha.
Pa’i Jasy.