Ñahendu Hesu Ñe’ê. Martes 8 de octubre

Ñahendu Hesu Ñe’ê. Martes 8 de octubre 

                                                           Lucas 10, 38 – 42.  

Ohokuévo Jerusalénpe, Jesús ha idisípulo kuéra og̃uahẽ peteĩ puéblope. Upépe, peteĩ kuña hérava Marta omog̃uahẽ chupe kuéra hógape  Marta ndive oiko avei ikypy’y hérava María. Ha oho María oguapy Jesús ypýpe ha ojapysaka hína Jesús rehe. Marta katu hembiapóva hína kosináme ha óga ñemopotĩme hamba’e, upéi oñemboja Jesús rendápe ha he’i chupe: 

—Mbo’ehára, nde rehechakuaái piko chenteha pe omba’apóva, ha María ndojapoiha mba’eve. Ere chupe ta che pytyvõ. 

Jesús ojere he’i chupe: — Marta, Marta. Heta mba’ére niko rejepy’apy hína. Ha rejepy’apy rei. Peteĩ mba’énte niko oĩ ovalevéva opa mba’égui. María oiporavo upéva, ha upéva ndoipe’a mo’ãi chugui avave.

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE… 

Heta mba’e ñande rogagua ñande py’apy: karurã, ao, pohã, escuela, óga apo. Ñane angekói, sapy’ante ndajakepái, jaju ha jaha, ñamohenda peteĩ ha jatopáma ambue isarambíva ñande hegui. Ñasẽ peteĩgui ha jaike jey ambuépe. Ndaipóri piro’y puku. Ha añete hápe ñaikotevẽ niko tembi’u, ao, óga, tesãi, ha opa umíva ndoúi ha’eño, ñañeha’ã mante jahupyty haguã ára ko’ẽre. 

Ko’ápe jahecha Hesu oguahẽha Marta rógape ha ha’e oguerohorységui Hesúpe hy’ái omohendapa haguã opa mba’e oñeikotevẽva, ha ikypy’y María katu oguapy ohendu Hesúpe, ijurujái upépe hina. Ha’ete ku mba’eve ndojapóiva ha Marta katu ipy’a ropu potáma hína. 

Hesu he’i Mártape ha he’i avei ñandéve ndajapytáiva ha ñanekane’õva, ñama’ẽ haguã noiméipa itapykue ñande hegui upe tekotevẽvéva. Ha tekotevẽ añete ñamopa’ũ ñane rembiapo, ani ñande tarova ha ñaneresasẽ peve ñamba’apo. Tekotevẽ ñamboguapy ñande py’a, ñamopa’ũ ára ha ára japytu’u ha ñañembo’emi haguã, ñahendu haguã Ñandejára ñe’ẽ, ñañemongeta haguã Hesu ndive. Jaha mísa hápe térã celebración pe domingo, jakaru Hesu mesápe ha ñañemopeteĩ hendive. 

Upéva ome’ẽta ñandéve pu’aka ñamboguata haguã opa mba’e ñande rekove rehegua, ha omyesakãta ñandéve ñande rape. Moõ gotyo pa jaha ha mba’éguipa jajehekýi vaerã. Ojo’apáramo jepe ñande rehe opaichagua tembiapo ha ñande kupyliáramo jepe nañande reityichéne. 

Aipóramo, ani rembyasy che irũ ha che reindy rembo’yke imi ha remopa’ũ haguã ne rembiapo ita, ehendu porãve ha eñandu pypukuve haguã Ñandejárape, ejotopa haguã hendive ñemongeta puku, ñembo’épe, neño térã nde rapicha kuéra ndive oguata nendive avei jerovia pópe. 

Pa’i Jasy.