Ñahendu Hesu Ñe’ê. Lunes 7 de octubre

 Ñahendu Hesu Ñe’ê. Lunes 7 de octubre 

                                                                       Lucas 10, 25 – 37.  

Upérõ peteĩ Moisés léi ombo’éva oho oñe’ẽ Jesús ndive. Ombopakova pirese chupe. Oporandu Jesúspe: — Mbo’ehára, mba’éiko ajapo vaerã ahupyty haguã jeikove opave’ỹva. 

Jesús he’i chupe: — Ha mba’éiko he’i umi mandamiéntope. Mba’e gua’u he’i ndéve.

Upe Moisés léi ombo’éva he’i: — Péicha niko he’i, “Ehayhu Ñandejárape nde py’aite guive, ne ánga rugua guive ha opa ne arandukue reheve. Ehayhu nde rapichápe rejehayhuháicha nde. 

Jesús he’i chupe: — Péicha añete he’i. Ha péicha rejapórõ, reikovéta. 

Pe mbo’ehára katu, opyta porãségui ha ohechauka haguã oikuaaha, osẽ he’i Jesúspe:

—Ha mávaiko aipo “che rapicha”. 

Upépe Jesús omombe’u chupe kóva ko káso: Peteĩ karia’y ndaje oguata ohóvo Jerusaléngui Jericópe. Tapére osẽ chupe mondaha atýra ha oipe’apa chugui opa oguerekóva. Ha heta ombyepoti rire chupe hikuái, oheja chupe omano vai-vai ha opívo. Peichahágui rei, ohasa sapy’a upe rupi peteĩ pa’i. Ha ohechávo hapichápe yvýpe ojepysóva hína, oñemboykénte chugui ha ohasa meme ohóvo. Upéi, ohasa avei upe rupi peteĩ pa’ípe oipytyvõva tupaópe. Ohechávo pe yvýpe oĩvape, oñemboykénte avei chugui ha ohasa oho.  Tapykuetévo katu, ohasa avei upe rupi peteĩ Samariagua. Ohechávo pe yvýpe oĩvape hína, oiporiahuvereko chupe. Oguejy henda árigui ha oja hendápe. Ha oipohãnomba porã rire umi oñenupã hague hamba’e, ojokua porãmba. Upéi, ohupi chupe henda ári, ha ogueraha mbohupa oguãhẽháme ha oñangareko hese upe pyhare. Ko’ẽmba rire, oheja plata’imi pe mbohupa róga járape. Ha he’i chupe, “Eñangareko porãmíkena chéve ko karia’ýre. Ha peichahágui ndohupytypáirõ ko ahejáva ndéve, ágã aju jeývo ame’ẽmbáne ndéve”.

Jesús ojere he’i pe Moisés léi ombo’évape: — Néi, ndéverõ guarã, máva ko’ãva mbohapy apytégui hína pe oñenupãmba vaekue rapicha. 

Upe Moisés léi ombo’éva he’i: — Ha upe oiporiahuvereko vaekue chupe. 

Jesús he’i chupe: — Néi, tereho ndave ejapo upéicha. 

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE… 

            Oñeporandúramo ñandéve mba’éichapa jahechauka vaerã jerovia Ñandejárare ha cristiano rekove, tenonderã ja’éta: E’a, ha jaha tupaópe, jaha misa hápe, ñañembo’e, ñahendu Ñandejára ñe’ẽ hamba’e. Sapy’ánte ikatu upépente japyta ha ñande resarái pe cristiano rapére jaguata haguã ñaikotevẽha mokõi ñande retymágui, peteĩva ha’e upe Ñandejára rayhu, ha pe ambue katu ñande rapicha rayhu. 

Mba’etekópa ñaime hína che reindy ha nde che irũ. Ñasẽpa jahecha ha ñañandu ñande rapicha oikotevẽ, ha’eño ha ojejopýva. Jahápa ñañemongeta, ñahendu ichupe, ñañembo’e hendive ha ñaipytyvõ ñande katumi háicha. 

Pa’i Jasy.