Ñahendu Hesu Ñe’ê. Domingo 6 de octubre

Ñahendu Hesu Ñe’ê. Domingo 6  de octubre

                                               Lucas 17, 3b – 10.      

Upéi Jesús he’i hemimbo’e kuérape: –Nde rapicha heko vaírõ, emongavaju chupe. Ohejárõ heko vaikue katu, eheja rei chupe. 4 Tahembiapo vai jepe ra’e nde rehe 7 jey peteĩ árape. Ha 7 jey oho ramo he’i ndéve reheja rei haguã chupe, reheja rei vaerã. 

5 Umi apóstol ojerure Ñandejárape: 

–Eme’ẽve oréve pe jerovia. 

6 Ñandejára he’i chupe kuéra: 

–Pende jerovia michĩ ramo jepe oimeraẽ mba’e ra’ỹi michĩve vaicha, pejéta peteĩ yvyra mátape: “Ejehapo’o upégui ha eñemohenda yguasúpe”, ha ojapóne pejéva. 

7 “Pe oguerekóva hembiguái oguahẽva oyvyjokahágui ha oñangarekohágui hymba kuérare, he’i nga’úpa chupe: ‘Ehasa ha eguapy ekaru?’ 8 Ahániri, he’i katu chupe: Ejapo chéve che karurã, ha eñemoĩ eñangareko che rehe che akaru ha amboy’u aja. Upéi nde ikatúne rekaru ha remboy’u.’ 9 Ha upéi ave, ndojeaguyjeme’ẽi upe tembiguáipe ojapo haguére umi he’i vaekue chupe. 10 Péicha avei peẽ, ágã pejapopávo umi Tupã he’i vaekue peẽme, peje vaerã: ‘Ore tembiguái ipituáva, rojapónte rojapo vaerã.’”

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE…

Pe ojerovia’íva oha’ã’i, ndojepoipái, ipyta ryrýi, mombyry guivénte opyta oma’ẽ, ndoikéi voi kánchape, pe ojerovia añetéva katu ojepoi paite, ojeity voi tapépe ha tembiapópe ohekávo upe oha’arõva ha oipotáva. 

Apóstol kuéra oñandu oikotevẽha jerovia mbareteve ojapo haguã upe Hesu ombo’éva ichupe kuéra: oñeha’ã haguã oipytyvõ umi hekove vaívape ha oheja rei haguã umi hembiapo vaívape hendive kuéra. Oñandu hikuái ijetu’u upéva ha upévare ojerure Hesúpe omongakuaa haguã ijerovia. Hesu katu he’i ichupe kuéra oiporu haguã pe jerovia orekóva, michĩramo jepe tojerure, tojepoi heseve, ndaha’e mo’ãi hina upe jerovia jarekóva, michĩ térã tuicháva upe ojapótava tembiapo, Tupã Ñandejára ha’e hina upe ojapóva ñandéve pe jajeruréva, ha’e ñande poriahuvereko ha ñande rayhúguinte ome’ẽ ñandéve jaipotáva. 

Ñande niko tembiguáinte, ndaha’éi mba’e jára, jajejokuáinte hina ha oñeme’ẽ ñandéve ñane rembiaporã. Jaiko va’erã ñe’ẽ rendúpe ha jahechakuaa va’erã mávapa ñande Tupã Ñandejára renondépe, ñañakãity ichupe jajapóvo upe ome’ẽva ñandéve ñane rembiaporã, ñande ru niko hina ha’e, ha ñande ñamomba’e va’erã ichupe ñande ruvicha guasúicha.  San Ignacio de Loyola he’i ñande ñañembouha ko yvy ári jaguerohory, ñamomba’e guasu, ha jaservi haguã Ñandejárape. 

Aipóramo niko ndaijái ñandéve henondepe ñane tĩpu’ã ha jajeapo mba’e guasúramo, ja’énte va’erã ñande ha’eha tembiguái pituva ñane rembiaporãnte voi jajapóva hina.  Ha ñande rapicha kuéra, ñane irũ nguéra avei ñandéicha, tembiguái pituva jerovia’i. Upévare ñane paciencia va’erã ojuehe, ñañopytyvõ, jahechakuaa ha jaheja rei ojupe ñande falla. 

Pa’i Jasy.