Ñahendu Hesu Ñe’ê. Martes V Cuaresma

Escucha el evangelio y la reflexión en: https://youtu.be/yE7o2cX9LSo

Martes V Cuaresma Juan 8, 21 – 30.

Jesús he’i umi judíokuérape: — Che niko aháta hína, ha che rekáne ágã peẽ. Che
ahatahápe katu ndaikatu mo’ãi peho, ha pemanóne ágã pende pekádo reheve.

Umi judío ruvichakuéra katu he’i ojupe: — Kóva piko ojejukáta mba’e ajeve he’i
ndaikatu mo’ãiha jaha ha’e ohotahápe.

Jesús he’i chupekuéra: — Peẽ niko yvy arigua, che katu yvagapegua. Peẽ niko ko
múndo rehegua, che katu nahániri. Upévare ha’e kuri peẽme pemanotaha pende pekádo reheve ndaperoviái ramo mávapa che.

Upépe oporandu chupe hikuái: — Ha mávaiko nde.
Jesús he’i chupekuéra: — Iñepyrũmby guive voi niko ha’émiva peẽme heta mba’e areko ikatúva ha’e pende rehe. Ha ahecha pende rehe heta mba’e pende reja vaíva. Upe che mbou va’ekue niko añeteguánte he’i. Ha che ha’e jey opavavépe umi mba’e chugui ahendu va’ekue.
Ha’ekuéra katu ndohecha kuaái Jesús oñe’ẽha chupe kuéra Ñandejárare.

Upévare osẽ he’i chupekuéra: — Peẽ, che rupiha ára yvate kurusúre, peikuaáta hína mávapa che.

Peikuaáta che ndajapoiha mba’eve che jehegui reínte. Che amombe’u umi mba’e che Ru he’i va’ekue chéve amombe’u haguã. Upe che mbou va’ekue oĩ hína che ndive. Che Ru nda che rejái cheño, che ajapógui umi mba’e chupe ombohorýva.
Ha heta umi ohendúva Jesúspe péicha oñe’ẽvo, ou ojerovia hese.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ajépa niko ñande jaiko ára ko’ẽre ñapensa ha jajepy’apy ñaneremikotevẽre,
ñande karurã, ñande aóre, ñande rete ha ñañepohano haguãre, ñande rógama katu, mitãnguéra remikotevẽ ha hetave mba’e jarekóva ñane akãme ha oraháva ñande py’a.

Hesu he’i umi judíokuérape: Che yvate, yvágagua ha peẽ katu yvy arigua. Ha
péva iporã ñapensami ñande avei, jahecha pype mba’éichapa umi mba’e yvy arigua omyenyhẽ ñande py’a, ñande jaikóta ramo guáicha opa ára ko yvy ape ári, ha nañanemandu’ái ko yvy ndaha’e mo’ãiha ñande rekoha opa ára guarã.

Hesu opyrũ hatã ramo jepe ko yvy ape ári, oma’ẽ ave yvate, ojesareko yvágare,
ha ohechávo upépe itúvape, ñanembo’e ñande avei ñañeha’ã aja ñande rekovére ko múndo apére jaikóvo, ñama’ẽ ha jajesaupi haguã ave yvága gotyo, ñanerendaguãme Ñandejára ykére, ani ñaimo’ã ko ñande rekove yvy arigua opávo ndaiporiha mba’eve ñanera’arõva.

Mba’épa nde reha’arõ che irũ ha nde che reindy, ko nde rekove hu’ãvo ha oguahẽ vove nde ára paha ko yvy apére. Mba’éichatapane hína nde reñandu oikotaha pe
jeikove yvágape, Hesu he’íva oimeha ñandéve guarã Ñandejára ndive.

Pa’i Alberto Luna.