Ñahendu Hesu Ñe’ẽ. Viernes 23º Durante el Año

Escucha el evangelio y la reflexión en: https://youtu.be/PoZ4Hdc1PC0

Viernes 23º Durante el Año Lucas 6, 37 – 42

Upérõ Jesús he’i idisípulokuérape: ani pemoĩ vai pende rapichápe, ndapeipotáirõ Ñandejára pene moĩ vai peẽme. Ani pejopy vai pende rapichápe, ndapeipotáirõ Ñandejára pende jopy vai peẽme. Peheja rei hembiapo vaikue pende rapichápe, ha Ñandejára oheja reíne peẽme pene rembiapo vaikue. Oikotevẽvape peme’ẽ, ha Ñandejára ome’ẽne peẽme peikotevẽva. Ipojeráne pene ndive ha ome’ẽne
peẽme pende vosa renyhẽ chovi. Peẽ pejapo háicha pende rapicháre, upéicha Ñandejára omyengovia jeýne peẽme.

Upéi Jesús omombe’u chupe kuéra kóva ko káso: Hesatũva nga’u piko ikatúne ogueraha ipógui hapicha resatũme. Nahániri aje. Mokõivéva ho’áne yvykuápe oñondive.

Ndaipóri avave ikatúva tuichave imbo’eháragui. Ojehekombo’e porã rire ae ikatúne ohupyty imbo’eharépe. Mba’éicha piko aipo rehecha pe yvyra ku’i nde ryvy resápe oĩva, ha nderehechái pe yvyra poguasukue tuja nde resápe oĩva. Ha nderehecháirõ pe nde resápe oĩva, nga’u piko mba’éicha nde py’a ere haguã nde ryvýpe, ‘Tanohẽna ndéve pe yvyra ku’i nde resápe oĩva’. Nde, tekove rova mokõi. Enohẽ raẽna pe yvyra poguasukue tuja nde resápe oĩva rehecha porã haguã. Ágã upéi ikatúne renohẽ pe yvyra ku’i nde ryvy
reságui.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Mbo’ehára ikatupyrýva ombokatupyry avei umi mitã oñemoĩva ipópe ohekombo’e haguã. Mbo’ehára arandu ombohasáta iñarandukue umi ombo’évape. Oiméramo peteĩ mbo’ehára ilápi mbyky ha olee sa’íva, piko mba’éicha ombo’éta mitãme olee porã haguã.

Jesús niko ombojoja upéva peteĩ ndohecháivare ha omboguataséva hapicha hesatũvape. Amo ipahápe mokoĩvéva ohóta hína ho’a yvykuápe.

Obispo kuéra ijaty vaekue Brasílpe, 2006 pe, amo Tupasỹ Aparecida tupao guasúpe. He’i opavave cristiano ha’eha: “Jesucristo remimbo’e ha hembijokuái”, ñande ha’eha “Jesucristo disípulo ha misionero”. Tenonderã ñañehekombo’e ñande jeroviáre.

Ñañemboja Jesús re, ñañemoirũ hese, jaikuaa porãve ichupe, ñañembokatupyry iñe’ẽre, jaikuaa mba’épa ñande iglesia ñane mbo’e. Jaike jey escuela pe, jakakuaapámaramo jepe. Ñande raẽ jajetavy’o ha ñañepohãno, upéi ñambo’e ha ñaipytyvõ porãve haguã ñande rapichápe. Ñapuntea ñande rapicha ha péicha ikatúta upéi jajerure upe ñande ñame’ẽ ha jajapo haguéicha.

Ani jajerure avavépe upe ñande voi ndajajapóiva. Ema’ẽkena nde jehe che reindy ha nde che irũ. Ehechakuaa raẽ nde fálla, ejerure Ñandejára ha nde rapichápe tanepytyvõ. Eñeha’ã nde jehe raẽ emyatyrõ ha emohenda porã haguã nde rekovemi. Upéicha ikatúta upéi reipytyvõ porãve nde rapichápe.

Pa’i Jasy.