Ñahendu Hesu Ñe’ê. Viernes 4 de octubre

Ñahendu Hesu Ñe’ê. Viernes 4  de octubre

                                                                       Lucas 10, 13 – 16 

   Upérõ Jesús he’i: Aichejáranga peẽ Corazingua. Aichejáranga peẽ Betsaidagua. Tíro ha Sidónpe mba’e ajapo rire umi milágro ajapóva pende apytépe, yma ojevy vaerã mo’ã hikuái Ñandejára gotyo. Omonde vaerã mo’ã hikuái ao vosakue ha oguapy tanimbu apytépe ohechauka hag̃ua oñembyasyha hikuái ipekádogui. Ág̃a ára pahápe, Ñandejára pene nupã rasyvéta peẽme umi Tíro ha Sidónpe oikóvagui. Ha peẽ Cafarnaumgua, peẽiko peimo’ã Ñandejára pene mog̃uahẽtaha yvágape. Ndaupéichai hína. Ñandejára pene mondóta uvei amo aña retã ruguápe.

   Upéi Jesús he’i idisípulo kuérape: — Oimeraẽva pene rendúva, chéve che rendu hína. Ha oimérõ ojahéiva pende rehe, che rehe ojahéi hína. Ha pe che rehe ojahéiva, ojahéi Ñandejárare, che mbouharére.”

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE…

Oime niko he’íva ojapopamaha ojapo vaerã tupaópe, ikarai, ipriméra comunión, oñeconfirma, omenda tupao ha oho miva misa hápe ha ñembo’épe, ha upévare ojerovia Ñandejára ohovasataha ichupe tuicha háicha. 

Ko’ápe jahecha Hesu oja’oha umi táva ha’e oiko hague rupi. Ko’ãva ojeroviaiterei orekógui Hesúpe ijapytépe kuéra ha oimégui itáva kuérape. Opáichavo ndoguerovái hekove. Ohechánte Hesúpe, ohendúnte ichupe, oguata ijykére hamba’e hikuái. Ha upéva añónte, he’i chupe kuéra Hesu, naiporã mo’ãiha ichupe kuéra mba’everã.  

Péva pe Hesu ñe’ẽ avei ikatu ñande ñamboguapy ñande jehe ñama’ẽrõ ñane retã ha’eha cristiano meme, ndaha’éi ramo 100 % haimete jahavere hina upéva. Haimete niko opavave ñande karai, taha’e katóliko, evangélico, protestante, térã ambue Iglesia guáva. 

Ha mba’eichaitépa upe ñande rekove ojuavy pe Hesu rembipotágui, mba’éichaitépa heta ñande rapicha oiko asýva ha oikotevẽva, mboriahu apĩgui ñane renyhẽ, ñahundipátama ñande rekoha Ñandejára ohejáva ñandéve ñañangareko haguã. Ha’eteku nañamoañetéiva upe cristiano reko. Mombyry ñande hegui upéva ha ñañembohéra ramo jepe cristiano, ndajaikói añete Cristo rapére. 

Ha upévare che irü ha che reindy, ho’áta ñande rehe upe Hesu ñemongavaju táva Cafarnaúmpe: Peimo’ã piko pende pojáita yvágare, araka’e mba’e, pejeitýta aña retã ruguápe. Ha añetehápe ndajaguerováiramo ñande lája, hetaite Ñandejára grásia oñeme’ẽ vaekue ñandéve iguérota ñande hegui. Nañamýi ramo jajapo peteĩ tetã ikatu hápe oje’e: Ko’ãva añete ha’e Hesu remimbo’e oikógui mborayhu ha tekojojápe oñondive. 

Pa’i Jasy.