Ñahendu Hesu Ñe’ẽ. Viernes VII de Pascua

Escucha el evangelio y la reflexión en: https://youtu.be/xHqUxLOtgOM

Viernes VII Pascua Juan 21, 1. 15-19

Oikove jevy rire Jesús ojechauka idisípulokuérape lágo Tiberias rembe’ýpe.

Orambosapa rire hikuái, Jesús oporandu Pédrope: — Nde, Simón, Juan Ra’y, ndéiko che rayhuve opa ko’ãvagui.

Pedro he’i chupe: — Hẽe, che Jára. Nde niko reikuaa rohayhuha.

Jesús he’i chupe: — Eñangareko che ovecháre.

Jesús oporandu jey chupe: — Nde, Simón, Juan ra’y, ndéiko che rayhu.

Pedro he’i chupe: — Hẽe, che Jára. Nde niko reikuaa rohayhuha.

Jesús he’i chupe: — Eñangareko che ovecháre.

Jesús oporandu jey voi chupe: — Nde, Simón, Juan ra’y, ndéiko che rayhu.

Pedro rehe oguapy Jesús oporandu jey haguére chupe, ha he’i:
— Che Jára, nde niko reikuaa opaite mba’e. Reikuaa porã niko rohayhuha.

Jesús he’i chupe: — Eñangareko che ovecháre. Añete ha’e ndéve, yma ne mitãvérõ reñembosako’ími va’ekue ha reho mamo rehosehápe. Ágã nde tujávo katu, reipysóta umi nde jyva ha oĩta nde jokuáva ha nde reraháta hikuái rehose’ỹháme.

Péicha, Jesús he’ise hína chupe mba’éichapa omanóta ha mba’éichapa omomba’e guasúta Ñandejárape.

Upéi Jesús he’i chupe: — Eju che moirũ.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Sapy’ánte ko jaiko vai ñande rapicha ndive, ñande rogagua ndive, ñande comunidagua, ñane hénte kuéra ndive. Ñañorairõ, jajoavy, ñande pochy oñondive, ha japyta nañañe’ẽvéi ojupe. Mombyrymínte japyta, ñande rari ojuehegui. Sapy’ánte ipuku ha ndojerái pe jeiko vai, ñande rova puku ojupe jaikóvo. Avave noguahẽséi oñemongeta oñemoĩ porã haguã oñondive.

Jahecha Hesu oikove jevy rire ojotopa Pedro ndive. Ha’e niko onega va’ekue oikuaaha Hesúpe. Ha upéva opyta peteĩ tatáicha ohapy hina Pédrope ipy’a. Hesu oikuaa porã hina Pedro rembiapo ha ohechakuaa upéva oiko’õha chupe hina.

Ha ha’e omoñepyrũ pe ñemongeta. Ndoja’ói chupe, naimandu’ái pe hembiapo vaíre hovake, oporandúnte chupe ha’épa ohayhu chupe, oiko porãsépa hendive, ohejasépa tapykue upe oiko va’ekue. Pedro he’íramo ohayhuha, Hesu avei he’i chupe ojeroviaha hese, ha omoĩha ipópe oisãmbyhy haguã ijovecha kuéra. Omyakã haguã apóstolkuérape.

Mbohapy vése oporandu chupe, omonguera haguã umi mbohapy Pedro he’i hague ndoikuaaiha chupe. Ijetu’u péva ha oguapy mitã Pédrore. Opáichavo Hesu ndoúi oñanduka vai haguã chupe, oipotánte oñandu añete ha’e avei ndaipochyiha hendive. Mba’etekópa che reindy ha nde che irũ.

Reñanimápa nde ave ejapóvo ko Hesu ñanembo’éva ñañemoĩ porã jey haguã umi jaiko vaíva ndive, eha’arõ’ỹre nde rapicha raẽ ou, ofalla ramo jepe nendive, nde epuntea pesẽ haguã tapépe. Mba’épa ere ichupe.

Pa’i Alberto Luna.