Ñahendu Jesús Ñe’ẽ. Sábado VII de Pascua

Escucha el evangelio y la reflexión en: https://youtu.be/fSM4YiWvCLQ?si=gZCteWuNBEXEaF7u

Sábado VII Pascua

Juan 21, 19-25

Upérõ Pedro ojere ha ohecha ouha hína hapykuérikuéra ku Jesús disípulo ha’e ohayhúva. Upéva voi vaekue niko ku senahápe oĩ va’ekue Jesús ykére ha oporandu va’ekue chupe “Che Jára, máva piko pe netraisionátava.”

Pedro ohechávo chupe, oporandu Jesúspe: — Che Jára, ha amóvape piko mba’e ojehúta.
Jesús he’i chupe: — Che aipotárõ oikove aju jey peve, piko mba’e ndéve. Nde, eju che moirũ.

Upévare, isarambi va’ekue ñe’ẽ umi Jesús rehe ojeroviáva apytépe, upéva pe Jesús disípulo nomano mo’ãiha. Jesús katu niko nde’íri vaekue nomano mo’ãiha. He’ínte vaekue “Aipotárõ oikove che aju jey peve, piko mba’e ndéve.”

Upéva upe Jesús disípulo, ha’e voi hína upe omombe’úva ko’ã mba’e ha upéi omoĩ va’ekue kuatiáre. Ha jaikuaa añetegua upe he’íva.

Hetaiteve mba’e niko ojapo vaekue Jesús. Ñamoĩmbátarõ kuatiáre opa ojapo va’ekue, ko yvy ári nda’ijapái chéne umi kuatia omombe’úva hembiapokue.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Peteĩ teĩ ñandéva niko ñane ambue ojuehegui, oje’éva voi niko upérupi umi ñane kuã ñande po rehegua jepe ndojojapái, iñambue ojuehegui ha upéicha omba’apo porãve ñande po. Ñandejára avei ñanemohenda peteĩ teĩme ikatu haguãicha pe peteĩ orekóva ha pe ambue ndo rekóiva oñomoirũ vove oñopytyvõ ha omba’apo porã oñondive.

Sapy’ánte ko ñande ñambojojapase ñande rapichakuérape. Ñande rógape voi ñahendu jepi oje’e ramo mitãme, mba’éichapa nde nderejapói ojapo háicha nde ryke’y. Ha avei ñande comunidápe, grupokuérape ñambojojapase sapy’ánte ñande rapicha ha jaipota peteĩchapa ojeguata ha ojejapo.

Jahecha Pedro oikeséma omohenda hapicha apóstol Juan rekove, oúva hina hapykuéri, ha oporandu Hesúpe mba’épa ojapóta Juan, mba’épa oikóta chugui, ha Jesús he’i chupe ani haguã ha’e ojepy’apy hapicha mba’épa ojapo, terã mamópa ohóta. Ha’e tojapo upe Hesu ojeruréva chupe ha toheja hapichápe toguata hapére.

Peteĩ teĩme Ñandejára ome’ẽ hembiaporã, omohenda ha oisãmbyhy iguatápe. Ndaha’éi ñande hína ñaisãmbyhy ha ñamohendáva ñande rapicha kuérape, taha’e jepe ra’e ta’ýra térã tajýra.

Reñandúpa che irũ ha nde che reindy, ñamohendase ramo ñande rapicha ñande jaipota háicha, iporãve haguãicha vaicha ñandéve, sapy’ánte ou nosẽi ñandéve upe jahecha háicha, tuicha jajavy. Ha osẽ ojapi ñande hegui otroláo ite ñande rapicha.

Péicha jave ikatu ñanemandu’a ko Hesu he’i vaekue Pedro pe: — Che aipotárõ nde rapicha péicha oguata, piko mba’e ndéve. Nde, eju che moirũ.

Pa’i Alberto Luna.