Ñahendu Jesús Ñe’ẽ. Domingo Pentecostés ára

Escucha el evangelio y la reflexión en: https://youtu.be/Dg6V9cCMQvI

Domingo Pentecostés ára Ciclo ABC Juan 20, 19-23

Upe árape voi, pe semána ñepyrũha ára pyharépe umi Jesús disípulo okyhyjégui hudíokuéra ruvichágui oñembyaty peteĩ koty ñembotypýpe. Ha upe Domíngo pyhare voi, Jesús ou sapy’a oñemoĩ mbytépe kuéra. Omomaitei chupekuéra he’ívo: — Ta pende py’aguapy joaitéke.

Upéva he’ipávo, ohechauka chupekuéra umi ipo ha pe ijyke ojekutu hague. Tuicha ovy’a hikuái ohechávo Ñandejára Jesucrístope. Upéi katu Jesús omomaitei jey voi chupekuéra:— Py’aguapy toĩ pene ndive. Che Ru che mbou haguéicha, che pomondo peẽme.

Upévo, oipeju hesekuéra ha he’i: — Ame’ẽ peẽme Espíritu Santo. Oimeraẽvape peẽ peperdonáva ipekádo, Ñandejára ave operdonáta chupe. Ha napeperdonái ramo katu, Ñandejára ave noperdona mo’ãi chupe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Ijespíritu’i, ipy’a mirĩ ñande rapicha”. He’i ningo lo mitã ohechávo pe máva oñakãity ha itindýnte voi oikóvo. Péva ndoho puku mo’ãi ha nomokyre’ỹ mo’ãi avavépe. Ha péicha nunga niko opyta kuri apóstolkuéra ha umi kuña omoirũva’ekue Jesús pe ha’e omano rire. Ha oikove jevy rire jepe noñakãrapu’ãmbái. Oñemboty ha oñetrankapa okyhyjégui judio ruvicha kuéragui. Ndorekói pe espíritu ombopy’a guasúva ichupekuéra.

Jesús oúvo oike ijapytépe, oipeju hese kuéra ipytu marangatu ha upévo oipe’a ichuguikuéra pe kyhyje ha py’a mirĩ. Jesús espíritu ombopy’aguasu ichupekuéra.

Ñande aveíko che irũ ha che reindy, ikatu jakyhyje ha ñatĩ ñande rapichakuéra apytépe ñamombe’u haguã jajeroviaha Ñandejárare, jahechauka haguã ñane rembiapo rupi ñande ha’eha Jesús rehegua. Ñande rógape jepe sapy’ánte ñatĩma ñahenói haguã Ñandejára,
Tupãsy ha sántokuéra. Ha upéva omo’ã Jesús pe ñande rekovépe, otranka ha omongañy ñane korasõ peteĩ kotypy ypytũ ramo guáicha. Ha upépe opyta ñande hegui Jesús kañymby, ha upekúevo ñande avei ñakañy.

Ajépa ñaikotevẽte Jesús oipeju ñane korasõme upe Espíritu Santo ome’ẽva py’aguasu, anivéma haguã ñatĩ ha ñakañy. Ñasẽ ha jakorre haguã opárupi kyhyje’ỹre, jarahávo Jesús Ñe’ẽ, ñambyatývo ñande rapichakuéra ha jahejávo pe Jesús Espíritu ombopyahu ñande Iglesia, ñande rekove, ñande róga ha ñane retã.

ÑAÑEMBO’E OÑONDIVE

Eju Espíritu Santo oreresape, eju ha embopyahu ore rekove, eju orembovy’a ha orembyetia’e Jesús rapére. Eju Espíritu Santo orembopy’aguasu, eju emyendy ore korasõme mborayhu, eju oremoarandu, eju orembopy’aguapy. Amén.

Pa’i Alberto Luna.