Ñahendu Hesu. Sábado II Durante el Año

Escucha el evangelio y la reflexión en:

Sábado 2. Durante el Año.

Marcos 3, 20 – 21

Upérõ Jesús oho hógape, ha upépe oñembyaty jevy heta iterei, ha chuguikuéra ndaikatuvéi okaru jepe Jesús ha idisípulokuéra.

Oikuaávo upéva Jesús héntekuéra, oho ogueraha haguã chupe he’ígui hese noiporãiha iñakãme.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Ou vai vove, ou vaipa”. He’i lo mitã. Ha péicha jave jajere háguionte jajejopy: ñande rógape, ñamba’apo hápe, mba’asy, tekotevẽ, jeiko vai, kane’õ. Ndaipóri jurujái ha piro’y. Mba’eve ndaigústoi. Iñypytũ ñandehegui ñande rekove ha opa mba’e ipohýi.

Ha’ete voi ku ndaipóriva avave ombovevuimíva ñandéve pe ñande jopýva ha ikatúva oipe’a ñande árigui umi ita pohýicha ñanemopoñýva.

He’i ningo San Alberto Hurtado, pa’i hesuíta Chile gua: “Oguahẽ chéve sapy’ánte umi ára pohýi, nosẽiva chéve mba’eve, añeñapytĩmba vaicha. Che py’aropu. Ajere háguionte ndahechái tape. Ajejopy vai che kupe, che renonde ha che ykégui.

Upéicha jave yvate gotyo mante ikatu asẽ. Ha ajesaupi Ñandejárape ahekávo pu’aka ha
pytu’u.”

Hesúre jahecha avei oko’i ha ojerepa oikotevẽva. Ojopypa chupe, ojepoi hi’ári ha ndohejái chupe pa’ũ okarumi haguãnte jepe. Upéva apytépe hi’arivéntema ihéntekuéra jepe oñemoĩ oñe’ẽ vai hese ha he’íma katu hese itarovaha.

Ijetu’u vove ñande rekove che reindy ha nde che irũ, oiméramo okopi ha ojepopĩa’óva ñande apére, taha’e jepe ra’e ñande roguagua. Ñañandúramo nañandepu’akái ha ñakañyha, ñanemandu’amínte Hesu avei ojejopy hague ñandéicha.

Jajesaupi ñande ave yvate gotyo, jajerure Ñandejárape pe piro’y ñaikotevẽva, py’aguapýpe ñasẽ jey haguã tapépe mbeguekatu.

Pa’i Jasy.