Ñahendu Hesu. Viernes II Durante el Año

Escucha el evangelio y la reflexión en: https://youtu.be/Mi514JoHdlQ

Viernes 2. Durante el Año.

Marcos 3, 13 – 19

Upéi Jesús ojupi peteĩ sérrope ha ohenói umi ohenoiseva’ekuépe. Oñembyaty rire, oiporavo 12 ijapytéguikuéra, omoirũ haguã chupe ha omondo haguã omyerakuãvo iñe’ẽ. Ko’ãvape ombohéra apóstol, ha ome’ẽ chupekuéra pu’aka omosẽ haguã umi añáme.

Ko’ãvahína umi 12 ha’e oiporavova’ekue: Simón, ha’e ombohérava’ekue Pedro, Zebedeo ra’ykuéra Santiago ha ityvýra Juan, umívape ha’e ombohéra Boanerges, Andrés, Felipe, Bartolomé. Mateo, Tomás ha Alfeo ra’y Santiago, Tadeo, Simón hetã rayhúva, ha Judas Iscariote, pe upéi omoñuhãva’ekue Jesúspe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Aty guasúpe niko ñakañýma ojuehegui, ndajajokuaapavéima. Hetaiterei ñaiméramo ndaikatuvéima ñañemongeta porã oñondive. Ñandejára peguarã katu nañakañýi, ñande retáramo jepe. Ha’e ñane renói ñande réra rupi, peteĩ teĩme ñanemohenda ha ome’ẽ ñandéve ñane rembiaporã.

Ñandejára niko ome’ẽ ñandéve tembiporu porã, ñane akã, ñande po, ñande py, ñande resa. Ha ojerovia ñande rehe. Ha’e ndojapói upe ñande jehegui ikatúva jajapo.

Ha’e oipota ñande jajevale, ani jajerure chupe upe ñande voi ikatúva jajapo.
Jahecha Hesu ohenói iñirũrã umi 12 apóstol, oime haguã ijykerete, ojokuái haguã chupe kuéra, oho haguã upérupi oñemoñe’ẽ hapichápe, ombo’e Hesu ñe’ẽ. Hesu oheja hekoviarã, ikatúva upéi omyakã tembiapo Iglésiape, ombyaty ha oisãmbyhy va’erãva umi Hesúre ojeroviávape. Ñande Iglésiape umi omyakãva ha’e ñande obispokuéra, opytáva apóstolkuera rekovia ha omosãva ñande jerovia rape ymaite guivéma oúva, Hesu ete omoñepyrũ va’ekue ha oguahẽva ñandéve ko’ãgaite peve.

Ñande avei che irũ ha che reindy, ndaha’éiramo jepe obispo, ñañehenói ñaipytyvõ haguã Hesúpe, ñambyaty haguã ñande rapichápe ha jaguata haguã oñondive Hesu ykére. Ha’e ñanembokatupyry ha ome’ẽ ñandéve pe pu’aka ñaikotevẽva, upe otokáva ñandéve jajapo haguã hekópe.

Pa’i Jasy.