Ñahendu Hesu. Hesu Rete Corpus Christi

Escucha el evangelio y la reflexión en: https://youtu.be/Qi7S3AUo0fI

Hesu Rete – CORPUS CHRISTI Ciclo A                               

                  Juan 6, 51 – 58.

Upérõ Jesús he’i umi héntekuérape: Che niko pe pan oporomoingovéva, oguejýva yvágagui. Upéva pe pan ho’úva oikovéta opa ára guarã. Pe pan che ame’ẽtava peẽme niko che rete voi hína. Ha che ame’ẽta opavave rehehápe, oikove haguã.

Kóva ombopochy umi judío kuérape, ha he’i hikuái ojupe: — Mba’éicha piko aipo hete ho’ukáta ñandéve.

Jesús he’i chupekuéra: — Añetéko ha’e peẽme, ndape’úi ramo Ñandejára ra’y rete ha ndapey’úi ramo huguykue, ndapeikove mo’ãi. Pe ho’úva che rete ha che ruguy oikovéta opa ára guarã, ha che amopu’ã jeýta chupe ára pahápe. Che rete ha che ruguy niko hína hi’upy añetetéva.

Che rete ha che ruguy ho’úva, peteĩnte chendive, ha che peteĩnte hendive. Che Ru, che mbou vaekue, niko oikove ha ha’e rupi che aikove. Péicha avei, upe che retégui ho’úva, oikovéta che rupi. Añe’ẽ niko hína peẽme upe pan yvágagui oguejy va’ekuére. Upéva ndaha’éi ku manáicha pende ru kuéra ypykue ho’u vaekue ha upéi omano. Nahániri. Pe ho’úva kóva ko pan, oikovéta opa ára guarã.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            “Pé ólla niko nañanera’ãrõi.” He’i ningo umi kuñakarai oikuaáva hína imemby kuéra oñembojataha mesáre karu órape. Oĩ voi he’íva “pe mitã juru ko nañanera’ãrõi”. Opavave niko añete ñaikotevẽ ára ko’ẽre tembi’u ohóva ñande ruguýpe, ome’ẽva pu’aka ha mbarete tembiaporã. Jaikuaa upéva’ỹre ndaikatúi jaha puku.

            Hesu ningo itiémpope oma’ẽ ha oiko va’ekue heseve kuéra avei. Heta tapicha mboriahu, hasýva, oikotevẽva niko oheka ichupe ha ojere hese oha’arõgui ichugui ñepytyvõ. Ha ha’e nokañýi ichugui kuéra. Ombo’e ichupe kuéra Ñandejára rape, oñembo’e hese kuéra, omboja’o upe orekóvagui ha omongaru. Ha ñanembo’e ave jaháramo ñañandu hasýva, ñamondéramo ndaijaóiva, ñamongarúramo ñande rapicha iñembyahýivape, hese jajapoha. Umi ñande rapicha oikotevẽva retére ñañangarekóramo Hesu retére ñañangareko. Umi ndahógaiva, oiméva kársel pe, opa umíva rete ha’e Hesu rete.

            Ko árape niko jaguerohory hína Hesu rete, Corpus Christi, he’ise hína Hesu rete.

Ha ñahendu angete Hesu he’i ome’ẽtaha ñandéve hete ha huguy, ome’ẽ haguã ñandéve tekove añete, tekove opave’ỹva. Ha upéva ningo ha’e oheja kuri ñandéve jajapo haguã opa ára ñanemandu’ávo hese pe mísa hápe. Oñeme’ẽ vove ñandéve Hesu rete, ñañemopeteĩ  hendive ha ñande oñondive oñopehenguéicha. Pe Hesu rete ha’e hína tembi’u ñande espíritu, ñane korasõme guarã, ome’ẽva pu’aka ñamboguata haguã jerovia ha mborayhu.

ÑAÑEMBO’E OÑONDIVE

Ñandejára Hesukrísto nde niko orembo’e vaekue ore rapicha oikotevẽva rete ha’eha nde rete, ha avei reheja hague oréve nde rete pe mísa hápe roñemopeteĩ haguã nendive. Ore pytyvõmíkena roñesũ ha roñakãity háicha ne renondépe mísa hape nde rete marangatu ete renondépe, upéicha avei torojayvy roñandu ha roipytyvõ haguã, mborayhu pópe, umi ore rapichá ohasa asývape, ha’éva avei nde rete. Amén.

Pa’i Alberto Luna, SJ.