Ñahendu Hesu. Viernes Semana X TO

Escucha el evangelio y la reflexión en: https://youtu.be/L4Tmxr8WQ8I

Viernes 10^a Semana TO      

                                                 Mateo 5, 27 – 32.

Upérõ Jesús he’i  idisípulokuérape: Peẽ niko peikuaa yma oje’e vaekue: “Ani reporomyakã ratĩ.” Che katu ha’e peẽme, oĩ ramo oma’ẽva kuñáre ha oguerekoséva chupe, upéva ipy’ápema voi omyakãratĩ hembirekópe.

Upévare, nde resa nde reitýtarõ pekádope, enohẽ ha emombo. Iporãve niko nde resa peteĩnte oñehundi, reho rangue Aña retãme reñehundi. Ha nde po nde reitýtarõ pekádope katu, eikytĩ ha emombo. Iporãve niko nde po peteĩnte oñehundi reho rangue aña retãme.

Oje’e vaekue avei, “Oĩ ramo opoíva hembirekógui, ome’ẽ vaerã chupe peteĩ kuatia.” Che katu ha’e peẽme: “Peteĩ kuimba’e opoírõ hembirekógui, ha ndaha’éiramo omenda’ỹ vaerã haguére ojuehe hikuái, ágã hembirekore omenda jevývo omyakã ratĩ chupe. Pe kuimba’e hese omendáva, oporomyakã ratĩta avei hína.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Kuña ha kuimba’e ojoayhúgui omenda, omopeteĩ ha ombojoaju mbareteve haguã hekove ojuehe. Oĩ niko omendáva tupaópe, ohovasa imborayhu Ñandejára renondépe oguata haguã oñondive opa ára guarã. “Naiporãi pe kuimba’e oiko ha’eño”, he’i niko Ñandejára ñe’ẽ. Oñondive katu omopu’ã pe óga ha oñemuña omoguahẽvo mitã, mborayhúgui heñóiva ipa’ũme kuéra.

Pe menda pa’ũme niko heta mba’e porã oiko, ha oime avei ijetu’úva. Peteĩ júgo ningo pe menda. Ha sapy’ánte ipohýi pe ñemboguata joja ha la karréta oúva hapykuéri. Ha ou upépe aña omoinge akã ratĩ, jeguata yke, ombohapéva upéi umi omendáva ojuejávo, ojoavy ha ojei haguã ojuehegui. Hesu ñanemomandu’a mba’épa he’i Ñandejára umi omendávape: Ani reporomyakã ratĩ.

Umi omendáva hakate’ỹ ramo hóga, mitãnguéra ha iñirũre, opyta vaerã iñe’ẽme, oguata peteĩ líñope, oñangareko ijehe ani haguã ombotavy iména térã hembirekópe ambue kuña térã kuimba’e ndive.

Pe kuimba’e ha kuña omendáva, ména ha tembireko, heta mba’e ohecháta ha ohendúta ombojuru he’ẽva chupe ombotavy haguã iñirũme, oiko haguã iñakãre omenda’ỹro guáicha, oñembo arriéro térã oñembo arriéra. Hesu he’i iporãve umívagui ojehekýi, omboty hesa ha ijapysa ani haguã ohendu, oma’ẽ térã opoko.

Iporãve mombyry ojere umívagui, ojere háicha mbóigui ohechávo ou hapépe, ani oheja ojelia jepe hese pe akã ratĩ ponsóña. Otrosa ha omombo mombyry haguã umi tentasión.  Ikuentave hína ojavy umíva, ani upéi ombyasy opytávo ombyai hague hekove, hóga, ifamilia ha iñirũ rekove.

Ajépa ningo che irũ ha che reindy ndaha’éi hína ivevúiva ko mba’e kóva. Mborayhu añete ha jerovia rupive mante ikatúne jaropu’aka. Mba’épa nde reñandu.

Pa’i Alberto Luna.