Ñahendu Hesu. Trinidad Marangatu ára

Escucha el evangelio y la reflexión en: https://youtu.be/OzQFY5h1D3w

Trinidad Marangatu ára Ciclo B

Mateo 28, 16 – 20

Upérõ umi 11 Jesús disípulo oho Galiléape, pe sérro Jesús he’i haguépe chupe kuéra oho hag̃uáme. Ha ohechávo chupe, oñesũmba hikuái henondépe. Oĩ jepe ijapytépe kuéra ndogueroviapáiva ha’eha Jesús pe ohecháva.

Jesús katu oñemboja hendápekuéra ha he’i: — Opa mba’e yvága ha yvýpe oĩva niko Ñandejára omoĩmba che pópe. Tapeho aipo ramo opa tetã rupi, pembo’e opavavépe ha pejapo chuguikuéra che disípulo.

Pemongarai umíva Túva, Ta’ýra ha Espíritu Santo rérape, ha pembo’e chupekuéra opa umi mba’e che pombo’e va’ekue peẽme. Peikuaáke aimetaha pene ndive ára paha peve.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñanemandu’a ramo ñande sy, ñande ru, ñane hénte kuéra jahayhúva rehe, ja’e jepi: Péicha ha
péicha he’ímiva mamíta, péicha ha péicha he’i va’ekue taita.

Péicha che mbo’e va’ekue che sy, péicha che mbo’e va’ekue che ru. Tuicha mba’e ñandéve guarã iñe’ẽngue. Opytáva ñane akã ha ñande py’ápe, ñamomba’e guasúva ha nañanderesaráiva araka’eve.

Hesu niko oguejývo ko yvy ári, ndoúi ha noñe’ẽiva’ekue ijehegui reínte. Ha’e he’i Túva Ñandejára hína pe ombouva’ekue ichupe yvága guive ñane rendápe. Ha opa mba’e Hesu ñanembo’e ha ojapova’ekue niko iTúva ombo’eva’ekue ichupe.

Ha Hesu omohu’ãvo hekove ha hembiapo ko yvy apére, ombyaty iñirũnguéra ha omoapesã haguã hembiapo ohokuetévo he’i ichupe kuéra anínte haguã hesarái umi mba’e ha’e ombo’e va’ekue ichupekuéragui. Ha he’iva’ekue avei Hesu ha’e oguahẽ rire yvágape, upégui omboutaha Espíritu Santo, omomandu’a haguã ichupe kuéra, ha ñandéve avei, opa mba’e ha’e ombo’eva’ekue.

Ha péicharamo ningo Túva Ñandejára, ita’ýra Hesukrísto, ha Espíritu Santo, ipeteĩ paite peteĩ
ñe’ẽme ha peteĩ tembiapópe. Otira joja hikuái ha oñomosã mbarete ojuehe.

Ñahendúramo Hesu ñe’ẽ jaikuaa hína Túva Ñandejára ñe’ẽha avei upéva. Ha Espíritu Santo katu hína pe ñanepytyvõva ñanemandu’a ha jajapo paite haguã hekópe Hesu ñanembo’e va’ekue.

Ha upéicha avei ñande ñamoañete hína pe Ñandejára ojapóva ñañeha’ãramo ñamosã tembiapo ha jaiko pete’ĩ ñe’ẽme ñande rapichakuéra ndive, taha’e ñande rógape, ñamba’apo hápe, taha’e ñande komunida, ñande barriope, taha’e ñande távape térã ñane retãme. Ñande py’a peteĩ ha jaguata jojáramo oñondive, upéicha ñamoañete ha ñamboguejy hína Trinida Marangatu mborayhu ñande apytépe.

ÑAÑEMBO’E OÑONDIVE

Túva Ñandejára embouva’ekue yvy ári nde ra’y Hesukrísto, Espíritu Sánto pu’aka rupive, py’a porã ha mborayhúpe penepeteĩ ha pemba’apóva ore rayhupápe; ore pytyvõmíkena ore avei roñeha’ã haguã roiko py’a peteĩme oñondive ore pehengue kuéra ndive. Amén.

Pa’i Alberto Luna.