Ñahendu Jesús Ñe’ẽ. Tupãsy ñemomarandu

Escucha el evangelio y la reflexión en: https://youtu.be/vJgihiZBsiI

Tupãsy ñemomarandu Lucas 1, 26 – 38

Ha 6 mése haguépe, Ñandejára omondo ánhel Graviélpe Nazarétpe, opytáva Galiléape. María, peteĩ kuñataĩ marã’ỹ, oikómiva upépe. Ha’e niko ome’ẽma va’ekue iñe’ẽ omenda haguã Josére. José niko David ñemoñare va’ekue.

Ñandejára ángel oike pe María oĩháme ha he’i chupe: — Maitei María. Ñandejára nderovasa. Ñandejára oĩ ne ndive.

María oñemondýi opytávo. Ha oikuaase mba’épa he’iséne pe maitei upéva.

Ñandejára ánhel he’i chupe: — Ani rekyhyje María. Ñandejára niko tuicha nde rovasa. Nde rye guasúta hína, ha ne membýta. Rembohérata pe mitã Jesús. Pe mitã tuicha mba’éta hína, ha oje’éta hese: “Ñandejára Yvatetegua Ra’y”. Ha Ñandejára omoĩngóta chupe rréi ramo, ijypykue Davídcha. Ha’e oisãmbyhýta hetã Israel opa árape guarã.

María oporandu Ñandejára ánhelpe: — Mba’éichata piko péicha, ko che ne’ĩrava amenda.

Ñandejára ánhel katu he’i chupe: — Espíritu Santo rupíta hína péva. Ñandejára Yvatetegua ne añuãta ipokatúpe. Upévare, pe mitã hérata Ñandejára Ra’y Marangatu.

Ha ne príma Isabel imembýta hína avei, iguãiguĩma ramo jepe. Ku oje’e va’ekue ndaikatuiha imemby, ojapóma hína 6 mése hye guasuha. Ñandejárape guarã niko ndaipóri ikatu’ỹva.

Upépe María osẽ he’i: — Che niko Ñandejára rembiguaimínte. Tojapo che rehe pe ere háicha. Ha Ñandejára ánhel oho.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ikatu piko Ñandejára ou che rendápe, oñe’ẽ chéve, ojevale che rehe. Máva piko che, Tupã ou haguã che rendápe. Péicha oiméne ombojere iñakãme María ou mboyve henondépe Ñandejára remimbou, ha péicha avei ñañandu ñande.

Tupã Ñandejára oma’ẽ ko yvy tuichakue -he’i San Ignacio- ha ohechávo hetaite ñande rapicha oñehundi ha oho aña retãme, ombou ita’ýra Hesúpe ñande pe’ávo mba’e vai poguýgui. Tupã ojevale Maríare omoheñói haguã ipype ta’ýra Hesu. Evy’áke, he’i Ángel Graviel Tupãsýme.

Evy’áke, he’i avei ñandéve. Ñandejára Espíritu oguejýta nde ári ha omoheñóita nde pype Hesu. Evy’áke.

Péva pe ñe’ẽ oguapy Maríare ha opyta oikuaa’ỹre mba’épa he’i térã ojapóta.

Ñande avei japyta ndajaroviapái ikatúne haguã Ñandejára oike ñande rekovépe. Ani rekyhyje – he’i ñandéve pe ángel – ani rekyhyje. Ejeroviánte, eñeme’ẽ Ñandejára pópe.

Jeroviánte pe ñaikotevẽva. Ñandejára ojapopáta, omohendapáta. Vaicha ikatu’ỹ ramo jepe, Ñandejára peguarã ndaipóri ikatu’ỹva. Ja’e ñande ave ñande sy he’i haguéicha: Néi Ñandejára, toiko che rekovépe Nde reipota háicha.

Pa’i Alberto Luna.