Ñahendu Hesu. Viernes Semana 16a TO

Escucha el evangelio y la reflexión en: https://youtu.be/zAabrpaRa8M

Viernes Semana 16^a TO                                                                

Mateo 13, 18 – 23.

Upérõ Jesús he’i idisípulokuérape:Amombe’úta peẽme mba’épa he’ise pe chokokue oñemitỹvakáso.Oĩ niko umi ohendúva pe ñe’ẽ porã Ñandejára Rréino rehegua. Ha ndoikuaáigui mba’épa he’ise, ou Aña ha ogueraha pe ñe’ẽ, ipy’apýpe oñeñotỹ vaekue. Umíva ojogua hína umi semílla ho’a vaekue tapépe.

Umi ho’a vaekue itatýpe katu, ojogua umi Ñandejára Ñe’ẽ ohendu ha ogueroviáva vy’apópe. Ha ndahapo pypukúigui ipype kuéra, ivy’a pya’e opa. Ohasa asy ramo térã ojejopy vai ramo ojerovia haguére Ñandejárare, pya’ete hesarái pe ohendu vaekuégui.

Upéi oĩ umi semílla ho’áva ñuatĩndýpe. Umíva hína umi ohendúva pe ñe’ẽ, ha ojepy’apýgui umi mba’e yvy arigua rehénte ha imba’eta rerekoségui, ko’ã mba’e ojaho’i ha ojuka pe ñe’ẽ, ha ndahi’ái.

Umi oñeñotỹva yvy porãme katu ojogua umi ohendúva pe ñe’ẽ, ha oikuaa porãva mba’épa he’ise. Upéi hi’a porã, ha oĩ hi’áva 100, oĩ katu hi’áva 60, ha oĩ hi’áva 30.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Hetaichagua niko oĩ pe kokue ha yvy. Ndaha’éi niko opavave iporãva ñañemitỹ haguã. Oime niko umi kokuere, yvy kane’õngue, oime umi oganáva ñana ha javorái, oime yvyku’i meméva, itaty, ha oĩ avei yvy pyahu iporãva ha eñotỹmívante ose porã.

Hesu niko oñembojoja peteĩ chokokue oñemitỹva rehe. He’i pe ñande rekove ha’eha Ñandejára kokue, oĩva hina hi’a porã haguãicha. Ha Hesu oñe’ẽ ha oñeñanduka ñande rekovépe. Oñemitỹje ha’e oikóvo hína ñande pype, oheja ohóvo ñane korasõ ha ñande py’ápe iñe’ẽ, semilla porãicha. Ñanekonvida ñañemosã ha jaguata haguã hendive.

Opáichavo he’i avei Hesu oĩha hína heta plága, ñana, ita, ñuatĩ, ikatúva ombyai pe semilla, heñóiramo jepe, ani haguã okakuaa ñande rekovépe.

Tenonderã ikatu nahesakãi pe Ñandejára rape ha upémarõ nañañeha’ãi ñantende porã ha jajehejántema voi ichugui. Ikatu jepe avei ñantende pe Hesu he’íva ha nañasesẽi pe ñande guatágui, ñane ate’ỹ ha jajeheja ichugui. Terã katu oime jajepy’apy eterei pe pláta ha mba’e reta potágui, jagosa haguãnte jaikose, ha upévagui henyhẽma ñane akã, ndaijavéima upépe Ñandejára. Ikatu avei niko ñapena iterei la hénte jurúre, jakyhyje oje’e ramo guarã ñande rehe ñane santulario itereiha ha mba’e, ñande pire pererĩgui jatrosa pe heñói ñepyrũva.

Ikatu avei, ha upéva hi’ãite, ñamboguapy ñande jehe pe Hesu remimbo’e, jajerovia ha jahayhu pe ñanembo’éva, jaheja okakuaa ha opu’ã ñande rekovépe.

Mba’etekópa oime nde kokue hína che irũ ha che reindy. Mba’eichagua yvy piko reñandu hína pe ne korasõme Hesu ñe’ẽme guarã. Pe Ñandejára grásia heñóiva ñande rekovépe ko ijeheguínte opu’ã, okakuaa ha hi’a porã. Ejeroviánte vaerã hese.

Pa’i Alberto Luna.