Ñahendu Jesús Ñe’ẽ. Jueves 16º Durante el Año

Escucha el evangelio y la reflexión en: https://youtu.be/UjR8bsXc2ZI

Jueves 16º Durante el Año Mateo 13, 10 – 17

Upérõ Jesús disípulokuéra oñemboja hendápe, ha oporandu chupe: — Mba’ére piko káso rupi meménte rembo’e.

Jesús he’i chupekuéra: — Ñandejára niko peẽmente oikuaauka umi mba’e ñemimby Ñandejára Rréino yvága peguáre. Chupekuéra katu niko nahániri. Upe heta oguerekóvape, oñeme’ẽvéta ha hembypáta chupe.

Upe oguereko’ỹvagui katu, pe michĩmi oguerekóva jepe, ojepe’áta chugui. Ko’ãva niko omaña ramo jepe ndohechái,
ha ohendu ramo ndoikéi chupe kuéra iñakãme.

Upévare amombe’u chupekuéra ko’ã káso. Ha péicha ou ojehu chupe kuéra ku proféta Isaías he’i va’ekue: Ko’ãva ohenduve ramo jepe ndoikuaa mo’ãi. Omañave ramo jepe ndohecha mo’ãi.

Ko’ãva akãme ndoike véima mba’eve, ijapysa ha hesa omboty. Péicha ojapo’ỹ rire hikuái ikatu vaerã mo’ã ohecha ha ohendu, térã ojecha kuaa, ha ojere ou che rendápe ha aipohano chupekuéra.’

Peẽme katu niko Ñandejára pende rovasa. Peẽ niko pende resa tee rupi che recha, ha pende apysa tee rupi che rendu. Añete ha’e peẽme, heta proféta ha heta imarangatúva ohechase va’ekue ko peẽ pehecháva ha ndohechái, ohenduse vaekue ko peẽ pehendúva
hína ko’ágã ha nohendúi.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oĩ ningo la itavýva, ndoikuaái ha ndopilláigui la oikóva opytáva pytũmbýpe. Ha oĩ katu oñembotavýva. Oikuaa porãva hína ha oiko ku nohendúi ha ndoikuaáiramo guáicha. Umíva ári hína Jesús omboguejy proféta Isaías ñe’ẽngue, he’iramo guare: “Ko’ãva akãme ndoike véima mba’eve, ijapysa ha hesa omboty.”

Ha upéicha Jesús oñemoñe’ẽ ha ombo’e vove umi hénte kuérape káso rupive, oĩ umi oñembotavýva Jesús he’ívagui. Ndopillái gua’u, ndohejaséi iguata tuja ha ojavy Ñandejára grásia. Ndaha’éi hína Jesús ndoikuaakaséiva ichupe kuéra. Ha’e kuéra hína la oñembotavýva. Ndoikéi hese kuéra bala.

Umi ndopillái ha oikuaaséva añete niko ou oporandu Jesús pe ha ha’e omyesakã ichupekuéra. Upévare ningo Jesús he’i umi oñemoaguĩva hese, oguatáva hendive, umíva ohupytyvéta ha okakuaáta, ochovíta Ñandejára mba’e porãgui. Ha umi ombotýva ijapysa ha ipy’a katu ojavýta pe Ñandejára grásia, ha ipahápe opytáta nandi vera.

Sapy’ánte ñande ave che reindy ha nde che irũ, ikatu japyta pytũmbýpe ha ndajapillapái mba’etépa upe Ñandejára ohechaukaséva ñandéve. Upéicha jajetopáramo ikatu jajerure, ñaporandu Jesús pe ñembo’épe, tañane rekombo’e, tañande resape’a ha ñanerenohẽvo tapépe, tomyenyhẽ ñande rekove imba’e porãgui.

Pa’i Alberto Luna.