Ñahendu Jesús. Jueves I de Cuaresma
1 marzo, 2023Ñahendu Hesu. Sábado I de Cuaresma
3 marzo, 2023
Escucha el evangelio y la reflexión en: https://youtu.be/KsqKeTcR_rA
Viernes 1 Cuaresma Mateo 5, 20 – 26
Jesús he’i idisípulokuérape: Che ha’e peẽme, peẽ peñeha’ãve ramo pejapo haguã Ñandejára rembipota umi fariséo téra Moisés mandamiénto ombo’évagui, peikéta Ñandejára Réinope.
Peẽ niko peikuaa oje’e hague pende ypykuérape yma: “Aníke reporojuka.
Oporojukávape hekovia va’erã hembiapokue.” Che katu ha’e peẽme: “Opavavépe oñemyengoviáta hapicha ndive ipochy haguérente jepe. Ha oimérõ he’íva hapichápe ‘Nde výro’, upéva ojereraha va’erã karai juez renondépe. Ha oimérõ he’íva hapicháre ‘Nde aña ra’y’ upéva ohóta ochyryry Aña retãme.
Upévare, eraha ramo hína ne ofrénda tupaópe ha ne mandu’a sapy’a nde rapicha ipy’a vaiha ne ndive, eheja ne ofrénda pe altar renondépe. Pya’e tereho nde rapicha rendápe ha eñemoĩ porã raẽ hendive. Upéi katu eju ha eme’ẽ ne ofrénda.
Oĩ ramo nde rerahaséva karai juez rendápe, tapérema voi eñeha’ã eñemoĩ porã hendive. Cháke karai juez ne mondóne préso, ha upégui rehasáta kárselpe. Ha upégui neresẽ mo’ãi neremyengoviapái peve pe karai juez omoĩ va’ekue ndéve.
Ñandejára Jesucristo ñe’ẽ
ÑAMBOGUEJY ÑANDE REKOVÉPE
Jahecha niko oĩha ñande rapicha oipe’áva hekove ambuégui. Oñorairõva ka’úre,
mondaha ojejukáva térã katu oporojukáva. Kuimba’e ojukáva hembirekópe, femicidio
oje’éva.
Oiko vaíva ha ojojukáva, oĩ umi drógare oikóva ojojukáva, ojesecuestráva ha ojejukáva. Ha oĩ avei mitã ojeitýva isy ryégui onace mboyve ha ojejukáva. Upe ñande rekove tuichave mba’e jarekóvagui ha ndahekoviáigui ko yvy ári niko nda’ijái avavépe oipe’a hapichágui hekove.
Hesu ñanemomandu’a ñande rapicha rekove ha’eha Ñandejára remime’ẽ tekotevẽva ñane rakate’ỹ hese ha ñañangareko. He’i háicha Ñandejára mandamiénto: Ani reporojuka. Hesu katu ojerureve ñandéve upéa ári jey.
Ñane mba’e porã haguã añete. Ñañeha’ã jajeheja pochy vaígui, ñe’ẽ pohýi, jehova api, tie’ỹ, jeja’o, juru guasu, ha jererosapukái ñande rapicha ndive. Hesu he’i umíva ikatuha ñanekondena ha ñanembo chyryry amo aña retãme. Ha marãve ndovale mo’ãi ñandéve ñembo’e puku nañañemoĩ porãi ramo ñande rapicha jaiko vaívandive. Ha upéi jaháne ágã ñañembo’e.
Aníkena ñambopuku eterei che irü ha che reindy, jaha haguã ñañemongeta.
Oime ramo ñande rapicha jaiko vaiha, ñande pochy térã ipochýva ñane ndive. Jaheka
mba’éichapa ñañemoĩ porãta oñondive, ñañoperdona ha jajora haguã oñeñapytĩ su’úva
hína ñande rapicha ndive. Ñande katu aja ñañembovevúi ita pohýi ñane akã árigui.
Pa’i Alberto Luna.