Ñahendu Jesús. Jueves I de Cuaresma

Escucha el evangelio y la reflexión en:

Jueves 1º Cuaresma Mateo 7, 7 – 12

Upérõ Jesús he’i: Pejerure ha Ñandejára ome’ẽta peẽme. Peheka ha ha’e ojuhukáta peẽme. Pembota Ñandejára rokẽ, ha ha’e oipe’áta peẽme. Ojerurévape niko oñeme’ẽ voínte. Ohekáva ojuhúva, ha okẽ ombotávape katu ojepe’a.

Nde ra’y ojerure ramo ndéve ho’umi va’erã piko rejeréta reme’ẽ chupe ita. Nahániri. Térã ojerure haguére ndéve pira, piko reme’ẽta chupe mbói. Nahániri.

Peẽ, pende reko vaíva Ñandejára renondépe, peẽ peme’ẽ kuaa ramo iporãva pende ra’ykuérape, ko’yteve pende Ru yvágape oĩva ome’ẽne iporãva umi chupe ojerurévape.

Upévare, pejapo pende rapicháre upe peẽ peipotaháicha ojejapo pende rehe. Upéva niko Ñandejára ñe’ẽ karaku hína.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime umi jaipota itereíva jaikoha hapykuéri jaikóvo, jajeruréva Ñandejárape, jaheka ha ñañeha’ãva jahupyty haguã. Ikatu jaipota ñande rogarã, ñande yvyrã, tosẽ porã ñandéve ñane rembiapo, tajakuera, tajaiko porã oñondive. Jesús he’i iporãha jaipota ha jaheka umi mba’e ñaikotevẽva jaiko porãve haguã. Ha umíva jajerure asy, jaheka ha ñambota Ñandejára rokẽ, ku mitã ojerure háicha itúvape.

Opáichavo jajerurévo ñañeha’ã va’erã avei. Ñandejára niko ome’ẽ ñandéve ñane akã, ñande po ha ñande jyva, ñande juru ha ñande py, ñamýi haguã ñande jehegui umi jaipotáva rekávo. Upévare, he’i háicha San Ignacio de Loyola, tekotevẽ jajapo opa mba’e ñande pópente oĩramo guáicha, ñaha’ãmbaitévo ñande jehegui ñande katuha peve, jaikuaáramo jepe opa mba’e oĩha Ñandejára póguype.

Jesús he’i túva ome’ẽha ita’ýrape umi mba’e porã ojeruréva, ha ohayhu porãgui ohekombo’e avei pe mitã ijehegui haguã. Ani oiko chugui tupãmba’e jára, ojerurévonte oikóva ha ndaijeheguíriva. Ñandejára ñanembokatupyry ha oipota avei ñamomba’apo hemime’ẽ, ñamongakuaa haguã mba’e porã ñande rekovépe. Ñañeorganisa, ñamba’apo oñondive, ñañemongeta.

Ñambota jave Ñandejára rokẽ ñembo’e rupive, ñambota avei mburuvicha rokẽ ojapo haguã hembiapo, jaha ñahenduka chupekuéra ñaneremikotevẽ ome’ẽ haguã ñandéve ñande derecho. Ha upéicha avei ñahendu va’erã ojeruréva ha oikotevẽvape ñande rehe. He’i
háicha Jesús: Jajapo ñande rapicháre upe ñande jaipotáva ojeapo ñande rehe, ha ani jajapo avavére upe ñande ndajaipotáiva ojeapo ñande rehe.

Pa’i Alberto Luna.