Ñahendu Jesús. Miércoles I de Cuaresma

Escucha el evangelio y la reflexión en: https://youtu.be/VcTlvLkALdc

Miércoles 1º Cuaresma Lucas 11, 29 – 32

Heta hetave upérõ umi oñembojáva ojapysaka haguã Jesús rehe. Ha osẽ ha’e he’i chupekuéra: Peẽ tekove ahẽ ko’agãgua ndaje pejerure chéve aipo milágro. Ndapehecha mo’ãi pehechaséva. Ñandejára ohechaukáta peẽme proféta Jonás rehe ojapo va’ekue. Ha ku Ñandejára omondo haguéicha Jonáspe ohesape’a haguã Níniveguápe, upéicha avei che, tesape’a hína peẽme guarã.

Ágã ára pahápe, peimévo Ñandejára renondépe, ku Rréina Sebápegua, opu’ãne ave ágã ha pene moĩ vai Ñandejára renondépe. Ha’e niko mombyry-mombyryvégui oho vaekue rréi Salomón rendápe ohendu haguã iñarandukue. Ha che ha’e peẽme, peteĩ tuichaitevéva Salomóngui oĩ hína ko pene renondépe ko’ágã.

Ágã ára pahápe, umi Ninivegua avei opu’ãne ha pene moĩ vaíne peẽme. Ha’ekuéra niko ojere vaekue Ñandejára gotyo Jonás oñemoñe’ẽ ramo chupe kuéra. Ha ko’ápe oĩ hína peteĩ tuichaitevéva Jonásgui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta niko oñemboja Ñandejárare, oho tupaópe oikotevẽ javénte, ojapo promesa, oheka imba’erãva. Ndaha’ei ku oguataséva Jesús rapére mba’e, omohendaséva hekove Ñandejára oipota háicha. Ahániri. Oñemboja oipotágui Ñandejára ome’ẽ chupe ojeruréva. Oñepohanoségui hetépe, ndorekóigui omba’apo haguã, ojejopy vaíguinte.

Ágã osẽvo pévagui mbyky oho jey haguã oiko jepi guáicha, heko ha iguata tujápe, imandu’a’ỹre oimépa aipo Ñandejára. Péva oñandu Jesús heta umi oñembojáva hendápe orekoha ipy’ápe. Oipota ha’e ojapo milágro oipe’a haguã ipohýiva iñakã ári kuéragui, oheja haguã upéi Jesús pe oguerova’ỹre ijepokuaaha aña ha ilája vai.

Jesús katu he’i oheka vaerãha chupe ndaha’éi ventáha rapykuérinte. Oheka va’erã chupe ohenduségui iñe’ẽ, oikuaaségui chupe, oguataségui hendive. Ojapo haguéicha pe kuñakarai guasu, yma ou va’ekue mombyryetégui ohendu haguã rréi Salomónpe.

Jesús he’i avei ñahendúvo chupe ha ñañembojávo hese ojepe’aha ñandéve tape ñambopyahu haguã ñande rekove. Jahechakuaa ha ñambyasy haguã ñane rembiapo vaikue, ñamyatyrõ ñande lája vai. Ojapo haguéicha umi tapicha rretovádo Ninivegua ohóramo guare proféta Jonás oñemoñe’ẽ chupekuéra. Ha upéicha che irũ ha che reindy. Iporã aipo ramo ko Cuaresma pe jahávo
jajerure umi Jesús ñe’ẽ oguapyve haguã ohóvo ñande py’áre jahechápa ndajajerái. Ani ñahendu ichupe ype apére ýicha.

Pa’i Alberto Luna.