Ñahendu Hesu. Viernes II Adviento

Escucha el evangelio y la reflexión en: https://youtu.be/sJ2iSjL4vSc

2° Viernes de Adviento

Mateo 11, 16 – 19

Upérõ Jesús he’i: Mávarepa ikatu ambojoja umi ko’agãgua? Ojogua umi mitã pe
okáre oñembojarúva ha osapukáiva ojupe: he’ívo: “Rombopu niko peẽme mimby ha
ndapejerokýi, ropurahéi peẽme purahéi jahe’o ha napenerasẽi.”

Ou niko Juan Bautísta, ndokarúiva ha ndo’úiva víno, ha peje hese oguerekoha aña. Upéi
katu aju che, kuimba’éicha pende apytépe, akaru ha ha’u vino, ha peje che rehe, che
karu ha che ka’uha, aikoha umi heko añáva ndive ha umi impuésto omono’õva Roma
peguarã ndive. Tupã arandu katu ojehechauka ñane rembiapokue rupi.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

“Nañame’ẽi gústo opavavépe”, oje’éva niko upérupi. Oĩ katu ombojaopyvéva: “Ñandejára jepe nome’ẽi gústo, mba’e piko la ñande”. Ha añete niko ndaikatuiha ñame’ẽ gústo opavavépe ha opa ára.

Ñañeha’ãramo jepe, taiporã iporã haícha ñane rembiapo, katuete oiméne omomorãva ha oiméne ombovaíva. Ha jatopáramo oguerohorýva katu oimémane amogotyove oñemohembe jeréva.

Ha péicha, ñapenátaramo hénte jurúre, ndaijokoháiva rehe, nañandepy’aguapy mo’ãi araka’eve. Jaikota ku kapi’i ñúicha ojepokãva yvytu oipeju háicha. Nórte aku oúramo ñanemoñenóta ha sur ro’ysã oipeju po’i vove ñanembopéta yvýre.

Hesu he’i Juan Bautísta ou hague oñe’ẽ pohýi ha omboguatase opavavépe ílore, ha ojetyvyro ichugui hikuái, he’i hese ojopy etereimaha. Ha upéi katu ou Hesu oikóva ijapytépe kuéra, ojehe’áva, okarúva hógape, oaperitáva hendivekuéra, omoguahẽva umi hembiapo vaívape ha mba’e, ha oñepyrũma he’i hese hikuái ika’uha ha ojehe’aha umi hekove ky’áva ndive.

Hesu oikuaa avei ñandéicha, mba’éichapa ijetu’u opavave omomorã ha oguerohory ñane ñe’ẽ ha ñane rembiapo. Ha’e oñandu ipirépe oĩha ohayhúva chupe ha ndaija’éiva hese, oĩha ojeroviáva hese ha ndoikuaaséiva ichugui mba’eve. Hógape jepe niko, ihénte kuéra apytépe jepe, oĩ ndojeroviáiva hese.

Hesu katu nomboguapýi ijehe umíva. Ha’e ndohekái voi oñeñe’ẽ porã hese. Ha’e ojaposénte upe Tupã oñandukáva chupe ojapo haguã. Ha upéicha he’i, upe teko arandu oúva Espíritu Sántogui ojechauka hína tembiapo rupive. Jajapóvo Ñandejára rembipota. Ha upépe ñapyrũ hatã vaerã che irũ ha che reindy.

Jajapo upe jaikuaáva ñande py’ápe ha ñañandúva Ñandejára ojerureha ñandéve. Marãve ndoikói umi ñe’ẽ upe riregua opu’ãva, taha’e iporãva ñanemokyre’ỹ haguã, taha’e ivaíva ñanemokangyséva.

Jaheja Ñandejára pópe, ñande ñañeha’ãmaguive jajapo iporãva.

Pa’i Jasy.