Ñahendu Jesús Ñe’ẽ. Lunes 13º Durante el Año

Escucha el evangelio y la reflexión en: https://youtu.be/_BtwYimKz_c?feature=shared

Lunes 13º Durante el Año Mateo 8, 18 – 22

Upérõ Jesús ohecha mba’éichapa umi héntekuéra ojerepa hese. Ohasa upémarõ Lágo Galiléa mboypýri. Upépe peteĩ hudíokuéra léi ombo’éva oñemboja Jesús rendápe, ha he’i chupe: — Mbo’ehára, che romoirũta mamo rehohápe.

Jesús he’i chupe: — Aguara niko oguereko ikeha, ha umi guyra hupa. Che katu ndarekói moõ ambojeko haguã che akã.

Peteĩ idisípulo katu he’i chupe: — Mbo’ehára, ikatu piko aha añotỹ raẽ che ru.

Jesús katu he’i chupe: — Eju katuna che moirũ. Eheja omanóva toñotỹ omanóvape.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Fiesta patronal, Tupãsy ára, heta hénte ombyaty, opaichaguáva oime. Umíva apytépe oĩ umi sapy’a py’aiténte voi oñembojáva. Oĩ katu oho pere peréva. Oĩ avei ohóva katuete domingo kue misa térã celebración hápe.

Upéi oime hína umi oho meméva ha oipytyvõva tembiapópe, omyakãva ñembo’e, oleéva Ñandejára ñe’ẽ, ombo’éva mitã ha mba’e. Ha oime avei umi oñemohembiapóva voi Ñandejára rehegua rehe, oikóva ára ha pyhare, hekove pukukue jave omboguata haguã Ñandejára ha tupaopegua tembiapo.

Ñahendu heta ijaty Jesús jerére, ojoguáma peteĩ hunsiónpe la hetakue. Heta oime oúnteva sapy’arã, ohechasénte ichupe, térã oipota omonguéra ichupe. Ndaha’éi ku opytaséva hendive ha omoirũséva ichupe. Oiméne péva oñandu Jesús ha osẽ oho upégui, ha upépe osẽ mokõi kuimba’e he’i chupe oikoseha iñirũ ramo.

Jesús he’i peteĩvape oikóse ramo iñirũ ára ha pyhare, tekotevẽ oñembyesarái hógagui, jeiko porã, tupa ha pytu’úgui. Ha’e ndorekóigui óga ha mamópa opytáta. Ha upe ambue kuimba’épe katu he’i tekotevẽha oñembyesarái hogayguágui, toheja itúva ha isy, toheja ohejáva opyta haguã hendive.

Ndaha’éi ningo hetápe Jesús ohenóiva opyta haguã hendive ára ha pyhare. Oime ningo umi 72 disípulo ohenói ha ojokuái va’ekue. Upéi katu sa’ivéma umi 12 apóstol oiporavo va’ekue ojokuái ha opytaite haguã hendive.

Upéicha avei ñande Iglesia pe oime kuña ha kuimba’e Ñandejára ohenóiva, ojokuái haguã, oiko haguã iñirũ ramo hekove pukukue. Ndahetái ramo jepe kuimba’e ha kuña ome’ẽmbaitéva iñe’ẽ ha hekove Jesús ykére oiko haguã, umívare tuicha háicha ojevale Ñandejára omoguahẽ haguã hetape iñe’ẽ, omoirũ, oipytyvõ ha ohekombo’e haguã Ñandejára rapére.

Ndépa reikuaa hína che irũ ha che reindy, nde komunidápe, nde vállepe térã nde família pe, ãichagua tapicha, kuña térã kuimba’e, ome’ẽmbaitéva hekovemi Ñandejárape ojevale haguã hese kuéra. Eguerohorýpa ha eagradesépa ichupekuéra péicha oiko haguére.

Pa’i Alberto Luna.