Ñahendu Jesús Ñe’ẽ. Martes 1º Pascua

Escucha el evangelio y la reflexión en: https://youtu.be/dM0qIYuXQhI

Martes 1º Pascua Juan 20, 11 – 18

Upérõ María opyta okápe pe itakua juru ypýpe, ojahe’o hína upépe. Upéi katu ojayvy ha omaña pe itakua ryepýpe, ha ohecha mokõi Ñandejára ánhel ijao morotĩmbáva oguapýva hína upe Jesús retekue oĩ haguépe. Peteĩ oguapy pe iñakã rendaguépe ha pe ambue katu ipy gotyo. Umi Ñandejára ánhel oporandu Maríape: — Mba’éreiko ne rasẽ.

He’i ha’e: — Ogueraha niko hikuái che Járape, ha ndaikuaái moõpa oheja.

Upéva he’ipávo, ojere ha ohecha Jesúspe oĩva hína upépe. María katu ndoikuaái chupe. Jesús oporandu chupe: — Mba’éreiko ne rasẽ. Mávape piko reheka.

María oimo’ã pe kokuére oñangarekóva pe oñe’ẽva chupe hína. Osẽ he’i chupe:— Nde, che karai, nde eraha rire na ere chéve moõpa reheja ra’e, ha taha ipiári.

Upépe Jesús ohenói chupe héra rupi: — María.

Ojere María he’i chupe: — Maéstro.

Jesús he’i chupe: — Anivéma epoko che rehe. Ne’ĩra gueteri niko ajupi jey che ru rendápe. Tereho emombe’u che ryvy kuérape aha jeytamaha che Ru, ha’éva pende Ru rendápe, che Tupã, ha’eva ave pene Tupã, rendápe.

María Magdaléna oho ha omombe’u Jesús disípulo kuérape ohecha hague Ñandejára Jesucrístope. Omombe’u avei chupe kuéra umi mba’e Jesús he’i vaekue chupe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta cristiano oĩ oguatáva comunida, grupo, movimiento, parróquiape, oñeha’ãva ha oipytyvõva umi omyakãvape, coordinadorpe, hermana, térã pa’ípe, omoirũva chupe opa ára, mante ojehecháva oguataha tupaópe. Ha oiko sapy’ánte pe pa’i térã pe hermana oho, oñehenói ambue tembiaporã ha ojerova upégui. Ha ou ñande rapicha oguapyete. Ha ñaporandu ramo chupe he’i: Yma ápe ore heta mba’e rojapo va’ekue pa’i ma’ẽra ndive, oiko ramo guare ko’ápe hermana ma’ẽra.

Upéinteko oho ha’e ha opa umíva, ndoikovéi yma guaréicha, ropytapa rei. Jahecha María Magdalena Jesús omano rire opyta vai, okañy chugui imaéstro, ha ndoikuaavéi mba’épa ojapóta, moõgotyopa ojapíta. Jesús ojechaukávo chupe, tenonderã ndoikuaái, ha upéi Jesús ojekuaauka rire, tuichaiterei ovy’a, ojuhu jey haguére chupe.

Ha pe vy’a tuichaite apytépe oañua ipy ha ndopoiséi ichugui. Jesús katu he’i chupe opoi haguã ichugui, ko’ãga ndaha’evéima ymave guaréicha. Tekotevẽma ha’e oguata ipýre, anivéma osaingo hese. Ha upépe Magdalena opáy ha ojéra, oha’arõve’ỹre ambue omboguata ichupe. Ohóma ha’ete voi omombe’u umi apóstol kuérape Jesús oikove jevy hague.

Noiméipa ñande avei che irũ ha che reindy, ñasaingo iterei pa’i, obíspo, térã hermánakuéra sái ruguáire. Ha ikatu oime ñaikotevẽ hína ñahendu Jesús etépe voi ñande tyvyróva ha ñande jokuái jaguata haguã ñande pýre ñamomýivo tembiapo ñande Iglésiape. Mba’épa reñandu.

Pa’i Alberto Luna.