Ñahendu Jesús. Miércoles 1º Tiempo Durante el Año

Escucha el evangelio y la reflexión en: https://youtu.be/LzpT89tb_m4

Miércoles 1º Tiempo Durante el Año Marcos 1, 29 – 39

Osẽ rire hikuái tupaógui, Jesús oho Santiago ha Juan ndive, Simón ha Andrés rógape. Simón rembireko sy iñakãnundu ha oĩ hupápe. Jesús ohendu upéva, oñemboja ha ipojáivo ipóre omopu’ã chupe. Upévo opi iñakãnundu ha oñemoĩ ohecha mba’épa ha’ekuéra oikotevẽ.

Ka’aruete, oikévo kuarahy, ogueraha hikuái Jesús rendápe opa hasýva ha ipajéva, ha opa tavagua oñembyaty hokẽnguera renondépe, heta hasývape opaichagua mba’asýgui Jesús omonguera ha omosẽ heta Aña. Ha ndohejái chupekuéra oñe’ẽ, ha’ekuéra oikuaágui chupe.

Ko’ẽ mboyve Jesús opu’ã ha osẽ pe távagui, ha oho ha’eñoháme oñembo’e haguã. Simón ha iñirũnguéra oho Jesús píari, ha ojuhúvo he’i chupe: Opavave nde reka.

Jesús katu he’i chupekuéra: Jaha umi hi’aguĩha rupi. Umi rupi avei tekotevẽ amyasãi che ñe’ẽ, upevarã niko asẽ va’ekue. Ha upéicha Jesús oiko Galiléa rupi omombe’úvo iñe’ẽ umi tupao rupi, ha omosẽvo añanguéra.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oĩ niko hetaichagua mba’asy oikéva ñande pype, jarekóva ñande, térã orekóva ñande rapicha. Oĩ umi mba’asy sapy’ánte ñande jokóva, ha ñande rógapente ñañepohanóva, pohã ñana ha jepytu’úpe. Ha oĩ katu umi mba’asy ñande reityetéva voi.

Hapo pypukúva ñande retépe ha ndaikatúiva péichánte jaipe’a. Tekotevẽva jaha ambue ñande rapicha oikuaavéva rendápe jaikuaa haguã mba’épa jareko ha mba’épa jajapo va’erã jakuera haguã. Oĩ avei mba’asy pochy ñane apytĩ su’úva ha heta ára ñane mosãva ha ñanemopoñýva. Ndaipóri doctor, médico ñana, térã ñembo’e ñande joráva.

Jahecha Jesús oñepyrũvo ko yvy ári omombe’u Ñandejára rembipota, oike umi tupaokuéra rupi ha upépe oñemoñe’ẽ ha avei omonguera hasývape. Pedro rembireko sýpe omonguera akanundúgui ha ha’e opu’ã ha oiko jey jepiguáicha hógape. Ha avei omonguera umi oñempajenávape. Opoko ha oñembo’évo ojora chupekuéra imba’asýgui. Omosẽ Aña rembiapokue ojaitypóva hetépe ha ombohasýva hetápe.

Jesús ha’e hina pe pohã mbarete Ñandejára omboúva ñandéve, oipohanóva ñande py’a ha omongueráva avei ñande rete. Opavave ou háicha hendápe, ikatu avei ñande che irũ ha che reindy, ñañembojami hese jeroviapópe.

Umi Aña sã ñane apytĩ su’úva omondoho haguã ñandéve. Ha umi mba’asy ñande jokóva ombogue haguã ñande hegui, ñamoĩvo ñande rekovemi ipópe.

Pa’i Jasy.