Ñahendu Jesús. Viernes 1º Tiempo Durante el Año

Escucha el evangelio y la reflexión en: https://youtu.be/_XUWyjtsIxc

Viernes 1º Tiempo Durante el Año Marcos 2, 1 – 12

Mbovy ára riremínte Jesús oike jey Cafarnaúmpe. Ojekuaávo ha’e oĩha hógape, heta eterei umi oñembyatýva ha ndaijavéi upe okẽ renondépe, ha ha’e oñe’ẽ chupekuéra.

Upérõ 4 kuimba’e ogueru peteĩ paralítikope. Ha ndaikatúigui oguahẽ Jesús rendápe hetágui umi upépe oĩva, ombokua hikuái pe óga técho ha’e oĩháme, ha upe rupi omboguejy hikuái pe hasývape, hupápe. Jesús ohechávo mba’eichaitépa ha’ekuéra ojerovia hese, he’i pe hasývape: Che ra’y, ojeheja reíma ndéve nde pekádo.

Upépe, umi Moisés léi mbo’eha oguapyvahína, he’i ipy’apýpe: “Mba’ére piko kóva péicha oñe’ẽ. Ojahéi niko Tupãre, hendaguépe oĩrõ guáicha. Tupã añónte niko ikatu oheja rei ñandéve ñane rembiapo vaikue.”

Ha Jesús oikuaágui mba’épa he’i hína hikuái ipy’apýpe, oporandu chupekuéra: Mba’érepa péicha pepensa. Mba’épa ndahasyive, ja’e ko paralítikope: “Ojeheja reíma ndéve nde pekádo”, térãpa “Epu’ã. Ehupi nde rupa ha eguata.”

Néi, ahechaukáta peẽme ko kuimba’e ikatuha oheja rei oimeraẽvape hembiapo vaikue. Ha upévo he’i pe paralítikope: Ndéve ha’e: ‘Epu’ã. Ehupi nde rupa ha tereho nde rógape.’ Upépe, pe paralítiko opu’ã, ohupi hupa ha osẽ upégui opavave renondépe. Ha opavave ohecha ramo, ha omomba’e guasu Tupãme he’ívo: Peichagua mba’e ndajahecháiva araka’eve.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande rapicha ojedesgraciáramo, oikotevẽ ramo operación térã pohã hepyetereíva niko oiko jepi vecino ha pariénte apytépe ñepytyvõ. Ndorekóiramo oho haguã oñepohano, ojehecháne omoguahẽva mba’yrúpe dóctor rendápe.

Ñahendu peteĩ paralítico pe oraha hapicha oiporiahuverekóva. Omoguahẽse etereígui Jesús rendápe opa ombokua pe óga techo omboguejy haguã henondépe, ndaikatúigui ohasa hénteta apytépe. Túicha ojerovia Jesús re hikuái ha ndojevy mo’ãi omoĩ mboyve pe hasýva henondépe.

Jesús ohechávo mba’eichaitépa ojerovia, oiporiahuvereko pe hasývape, oipohano raẽ ipy’apy operdonávo ichupe. Upéi katu oipohano hete ha omopu’ã oguata ijehegui.

Ikatúko hína che reindy ha nde che irũ oime avei umi ñande rapicha ndoguata porãiva, nosẽiva tapépe, ndaikatúiva opu’ã ipýre. Oikotevẽva hína ñande mba’e ñañeha’ã hese ha jaraha ichupe Jesús renondépe. Toñemboja hese, tohendumi Jesús ñe’ẽ, toikuaa chupe. Jaheja Jesús pe toperdona ichupe, toipohano ikorasõ ha tomopu’ã jevy.

Pa’i Jasy.