Ñahendu Jesús Ñe’ẽ. Domingo 31º Durante el Año

Escucha el evangelio y la reflexión en: https://youtu.be/ZsSZ-7otg-Y

Domingo 31º Durante el Año Ciclo A Mateo 23, 1 – 12.

Jesús oñe’ẽ jave idisípulo kuéra ndive, he’i chupekuéra: Umi fariséo ha umi Moisés léi ombo’éva niko hína umi oikuaavéva mba’épa oĩ hína Moisés léipe.

Upévare, pene ñe’ẽ rendu va’erã chupekuéra ha peñeha’ã vaerã pejapo opa he’íva peẽme. Umi mba’e ojapóvante ani pejapo. Ha’ekuéra niko he’i peteĩ mba’e, ha ndojapói pe he’íva.

Ñande apére oity heta mba’e pohýi, ha’ekuéra katu ikuã’ínte jepe nomongu’éi ojapo haguã. Opa ojapóva, ojechauka haguãnte ojapo. Omboja isyváre térã ijao jyváre Ñandejára Ñe’ẽ pehẽngue mimi. Ha umi ijao katu ombofléko puku-puku ohechauka haguã gua’u ojapoha opa mba’e Ñandejára oipotáva.

Tupaópe térã karu guasuhápe ohórõ katu, ku poguasúrõ guáicha gua’úko oikose. Jajotopa ramo hendivekuéra oimehápe rei, oipota tuicha ñamomaitei chupekuéra ku ñane mbo’ehára guasu guaichárõ ha’ekuéra.

Peẽ katu, ani peheja avavépe he’i peẽme peẽ mbo’eharaha. Peẽ niko ojoryvy, ha peteĩnte pene maéstro. Ha ani avavépe peje “che ru”. Peteĩnte niko pende ru, ha ha’e oĩ yvágape.

Ani avei peheja avave he’i peẽme “myakãhára”. Che añónte, pe Mesías, pene myakãhára hína. Pe tuichaséva pende apytépe, toiko ku tembiguáirõ guáicha ha’e. Umi ojejapo ha oñembotuicháva niko oñemomichĩ vaerã ágã, ha umi heko mirĩva katu oñembotuicháne.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Ñahendu ningo sapy’ánte opu’ãha ñe’ẽ Pa’ikuéra rehe, Hermana, obispo, ha opa Karai Pápare ndofaltái he’íva naiporãiha he’íva térã ojapóva, ha mba’érepa ñande ñapenáta hesekuéra ñandeichaguávante avei, mba’érepa ñaneñe’ẽrendúta chupekuéra oiméramo ha’ekuéra voi ndojapopái hendápe upe he’íva, ha sapy’ánte tuicha ojavy.

Ha péicha avei oúne raka’e umi apóstol he’i Jesús pe umi fariseo ha Moises léi ombo’éva ndojapoiha upe he’i háicha, oiméne oimo’ã hikuái Jesús he’itaha chupekuéra: pejeheja chuguikuéra ha anivéma pehendu. Jesús katu nde’íri upéicha.

Upéva rangue he’i opavavépe iñe’ẽ rendu ha ojapo haguã he’íva, anínte ojapo ha’ekuéra ojapo háicha.

Upéva ikatu ñande jaiporu avei ñande rekovépe, jaikuaa pype umi ñanesãmbyhýva ha’eha tapicha kangy ñandeichagua, ndaikatúiva ojapopa hekópe opa mba’e. Ñande sy, ñande ru, ñande ruvicha, ñane mbo’ehára, catequista, ñande coordinador, autoridakuéra, pa’i, hermana, obispo; taha’e ha’éva ñane myakãva, oreko manteva’erã ojavyha. Ha upéva nde’iséi hína jajehejántema va’erãha ichuguikuéra ha jaiko ñane akãre. Jesús ñanembo’e ñahendu ha jajapo haguã hekópe ñande ruvichakuéra he’íva ñandéve. Oiméramo hikuái hembiapo vai katu aní upévare jajapo ñande.

ÑAÑEMBO’E OÑONDIVE

Ñandejára Jesucristo, rojerure ndéve eipytyvõmi haguã ore ruvichakuérape, upe orembo’éva iñe’ẽme tomoañete avei hembiapópe, ore sambyhy haguã tape porãre. Amén.

Pa’i Jasy.