Ñahendu Jesús Ñe’ẽ. Lunes 31º Durante el Año

Escucha el evangelio y la reflexión en: https://youtu.be/ilmdvJ4pZfU?si=SG9e2o2Rhk6r6_vC

Lunes 31 Durante el Año Lucas 14, 1. 12 – 14

Upérõ pytu’uha árape, peteĩ fariséo ruvicha okonvida Jesúspe oho hag̃ua osena hendive hógape. Opa umi oĩva upépe omaña joa hikuái Jesús rehe.

Jesús he’i pe chupe onkonvida va’ekuépe: Rejapórõ karu guasu, árape térã pyhare, ani ekonvida ne irũ nguérape, térã nde ryvy ha nde ryke’ykuérape, térã nde rogaguápe ha umi rríkokuéra nde róga jere rupi oikóvape.

Ág̃a upéi, ha’ekuéra ave ne konvidáne, ha péicharepyta porã hendivekuéra. Ág̃a rejapo jeývo, ekonvida umi imboriahúvape, umi ipy chékeva, iñepãva ha umi hesatũvape.

Ha’ekuéra niko ndaikatu mo’ãi ne konvida mba’evépe ha ndaikatu mo’ãi omyengovia ndéve. Ñandejára katu tuicha nde rovasa va’erã ág̃a opa hekojojáva oikove jeyha árape.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Pe ñane sánto árape ningo jajapo jepi tembi’u porã, jajogua jay’umi va’erã, ha ñakonvida ñane héntekuérape, ñane irũ jahayhúvape. Oiméramo ñamboty aniversario, térã katu oikóramo menda, mitã karai, quince año, colación ha mba’e niko katuete umíva ogueru vy’a ha oñemosã jepi karu guasu, jeroky, jotopa reheve, jaguerohory haguã oñondive ñande rekove ha Ñandejára gracia porãita. Ha umivarã ningo sapy’ánte oñekonvida karai guasu kuéra, ojeheka mitã karaípe guarã umi paíno ikatu va’erã upéi ojevale hese.

Umi mburuvicha oñemboguapy iporãvehápe ha oñemongaru porã ágã upéi ojejerure haguãicha ñepytyvõ compadre térã comadre ro’ópe. Ha upéi ave jaikuaa ojejapoha karu guasu, jeroky, aty guasu ojajaipáva, hepy hepýva, fiesta social oñehenóiva, ojejapóva oñeipytyvõ haguã mboriahukuérape hepykuére. Mboriahu katu ndohói upépe, umi ipláta hetávante. Oho ojechauka opyta porã haguã ha oñeñe’ẽ porã haguã hesekuérante.

Jesús niko ohómiva umi karu guasu hápe, óga hárupi oñekonvidáramo vy’arã, menda hápe ha aty porãme ha’e oho avei okaru ha omboy’u hapicha kuéra ndive. Ovy’akuaa ha’e hapicha kuéra ndive, ha ohecha avei mba’éichapa oĩ oñembotapykuéva. Ha ombojoja pe Ñandejára Reino, yvága pegua, karu guasu ha vy’a reheve. Upépe jepe, he’i Jesús, itenondéta umi ko’ãga itapykuéva ha itapykuéta umi itenondéva. Ha upévare che reindy ha nde che irũ, Jesús ñanembo’e javy’a kuaa haguã, jajejapo’ỹre ñande avei.

Ñakonvida mboriahu, hasývape, umi ndaikatúiva omyengovia ñandéve. Ñandejára ñande rovasáta ha tuicha háicha omyengoviáta hína ñandéve amo ipahápe.

Pa’i Jasy.