Ñahendu Jesús Ñe’ẽ. Jueves 32° Durante el Año

Escucha el evangelio y la reflexión en: https://youtu.be/6BMGZeOOEdc

Jueves 32 Durante el Año Lucas 17, 20 – 25

Upérõ umi fariséo kuéra oporandu Jesúspe araka’épa og̃uahẽta Ñandejára Rréino. Jesús he’i chupe kuéra: — Ág̃a Ñandejára Rréino og̃uahẽvo ndaha’e mo’ãi ku opavave ohechátava. Avave nde’i mo’ãi, “Na’ápe hína” térã “Péina amo”. Ñandejára Rréino niko oĩma voi pende apytépe.

Upéi Jesús ojere he’i idisípulokuérape: Og̃uahẽ vaerã ára pecherechase chéve, sapy’amínte jepe, aimévo pende apytépe. Ha ndapecherecha mo’ãi. Oĩne osẽva he’i peẽme: “Na’ápe hína” térã “Péina amo”. Péicha oje’érõ peẽme anítei pepena. Ág̃a aju vove yvágagui, ku aratiríchata hína, omyesakãmbáva ára tuichakue. Tekotevẽnteko heta ahasa asy raẽ. Ha upéi ave, hetáta hína umi ojahéitava che rehe.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Ñande ypykue guaraní niko oheka va’ekue upe yvy marane’ỹ. Upéva ha’e hina pe yvy ndaipóri hápe mba’e vai, mba’asy, ñembyahýi, ñorairõ. Oĩ hápe vy’a, py’aguapy ha joayhu. Upe yvy marane’ỹme ojeiko tekojojápe ha ndaipóri kyhyje térã pochy oñondive. Upépe Ñande Ru oisambyhy ha ome’ẽ joja opavavépe oikotevẽva oiko haguã py’a porãme oñondive.

Ha upéva niko upe ñande avei jaipotaitéva ha jahekáva ha ja’éva: Araka’épa ñande py’aguapýta. Araka’épa opáta jeiko asy ha ñorairõ. Araka’épa jahupytýta Ñandejára jehovasa, ojei haguã ñande apytégui mba’asy, ñembyahýi, tekotevẽ. Oguahẽnepa upe ára umíva jahupytývo jaiko porãite haguãme oñondive.

Umi fariséo oho oporandu Jesús pe araka’etépa Ñandejára oguahẽta oñemoĩ ñande ykére oisamby ko yvy, ojapo haguã peteĩ tetã pyahu oguatáva hekópe. Ohechakuaa hikuái upéva ha’eha Ñandejára remime’ẽ, ndaha’éiha ñande ikatúva jajapo.

Jesús he’i chupekuéra Ñandejára Reino oĩmaha ijapytépe kuéra, ha’ete voi omoñepyrũha. Jesús ha’e Ñandejára oguejýva oiko ñande apytépe. Jaguatáramo Jesús ndive, ñañesambyhýramo iñe’ẽre, ñande avei, che irũ ha che reindy, jaike Ñandejára korapýpe. Ko yvy ári jaguatávo hendive heta jajehovasa ha ñañandu Ñandejára mborayhu.

Umíva pa’ũme jahasa asy avei ha’e ohasa asy haguéicha, ñaguahẽ meve yvágape ha’e oime háme ñane ra’arõ. Ha upépe ae ñanemoguahẽ haguãicha vy’a ijapyra’ỹvape.

Pa’i Jasy.