Ñahendu Jesús Ñe’ẽ. Viernes 31° Durante el Año
8 noviembre, 2024Ñahendu Jesús Ñe’ẽ. Domingo 32º Durante el Año
9 noviembre, 2024
Escucha el evangelio y la reflexión en: https://youtu.be/QgaLOzKgcf0
9 noviembre: Basílica Letrán gua ára Juan 2, 13-22
Hi’aguĩma Páskua arete, ha upévare Jesús oho Jerusalénpe. Tupaópe ojuhu umi opa mba’ére oñemúva. Oĩ ovendéva novíllo, ovecha ha pykasu hamba’e. Ojuhu avei upépe umi pláta okambiáva oguapy joáva hína imesakuérape. Ha Jesús ohechávo upéva, ipojái peteĩ tukumbóre ha omosẽmba chupekuéra tupaógui, hymbakuéra reheve.
Umi pláta okambiávagui katu, ojapetepa ipláta yvýre ha oitypa umi imesakuéra. Umi pykasu ovendévape katu he’i:— Penohẽmba chéve ko’águi ko’ã mba’e. Che Ru rógagui anive pejapo merkádo.
Upépe idisípulokuéra imandu’a Ñandejára Ñe’ẽme he’iha: “Mborayhu arekóva nde rógare niko ikusugue che rejáta”.
Umi judío poguasukuéra oporandu chupe:— Mba’e milágro rejapóta rohecha haguã nde ikatuha reju rejapo ko’ã mba’e.
Jesús he’i chupekuéra: — Peitypa ko tupao, ha mbohapy árape amopu’ã jeýne.
Umi judío katu he’i chupe: — Kóva ko tupao niko 46 áñope oñemopu’ã va’ekue, ha piko nde remopu’ã jeýta mbohapy árape. Ha Jesús oñe’ẽvo tupaóre niko, hetére oñe’ẽ hína chupekuéra.
Upévare, Jesús opu’ã jeývo omanóva apytégui, idisípulokuéra imandu’a upe Jesús he’i vaekuére. Upépe oguerovia hikuái upe Ñandejára Ñe’ẽme he’íva ha upe Jesús he’i va’ekuére avei.
Ñandejára Jesucristo ñe’ẽ
ÑAMBOGUEJY ÑANDE REKOVÉPE
Ymaiteve, ñande Iglésia ñepyrũme niko umi ojeroviáva Ñandejára Jesucristo re oñembo’e ha ohendu haguã Ñandejára Ñe’ẽ oñondive, noñembyatýi va’ekue tupaópe. Ndaipóri vaekue voi tupao guasu ñande jareko háicha ko’ãga. Ha óga kuéra rupínte ijaty ha ojotopa vaekue apóstolkuéra umi ojeroviáva ndive.
Ko árape ñanemandu’a ha jaguerohory hína Basílica Letrán rehe, oiméva amo Roma pe. Upéva hína pe tupao guasu tenondete ojejapo vaekue amo 300 áño rasami Ñandejára Jesucristo omano ha oikove jevy rire. Ha upéva mboyve ndaipóri va’ekue tupao guasu cristianokuéra oñembyaty haguã oñembo’e.
Jahayhu ha ñamomba’e ramo jepe ñande tupaokuéra, jaikuaa va’erã ñande jerovia ikatuha avei oñemboguata ndajarekói ramo jepe tupao guasu, ha ikatuha avei ñambojerovia Ñandejárape ñande rógakuéra ha oimehárupi. Jesús ohayhu va’ekue pe tupao guasu Jerusalén gua, opáichavo jahecha mba’éichapa ipochy eterei ohechávo ojejapo pe tupaógui peteĩ mercado platarã.
Pa’i Alberto Luna.