Ñahendu Jesús Ñe’ẽ. Sábado 31° Durante el Año

Escucha el evangelio y la reflexión en: https://youtu.be/yMTRaXKZieM

Sábado 31 Durante el Año Lucas 16, 9 – 15

Upérõ Jesús he’i idisípulokuérape: Upévare ha’e peẽme, peiporúke opa mba’e repy yvy arigua peñemoĩ porã hag̃ua heta ndive. Péicharõ ág̃a opa vove pendehegui pende pláta, Ñandejára pene mog̃uahẽne yvágape.

Upe michĩ ra’ymíre oñangareko kuaávape niko, hetave mba’e ikatu jaheja ipópe. Ha upe michĩ ra’ymíme ipokarẽvape, ko’yteve ipokarẽta heta mba’e oñemoĩ ramo ipópe. Ha pende pópe ndaikatúi ramo jaheja pláta ra’ymi, pokarẽme oñembyatýva, piko máva ohejáta pende pópe umi mba’e ovaléva. Ha pende rapicha mba’e ndapereko kuaáirõ piko, máva ome’ẽta peẽme pene mba’e teéva.

Patron niko ndajareko kuaái mokõi. Peteĩre na ñandea’éi chéne ha jahayhuve pe ambuépe. Ha peteĩrente ñapenárõ, ñamboyke pe ambuépe. Ha upéicha avei, ndaikatúi ñambojerovia Ñandejárape ha pláta oñondive.

Umi fariséo ipláta rayhúva, ohendúvo upe Jesús he’íva, opukapa hese. Jesús katu osẽ he’i chupekuéra: Peẽ niko umi pejechaukáva ku pende reko jojárõ guáicha. Ñandejára katu oikuaapa mba’épa oĩ hína pene korasõme. Umi mba’e ñande ñamomba’etéva niko ndaha’éi
mba’eve Ñandejára renondépe.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

He’i ningo lo mitã: “Pláta ha kuarahýre ndaikatúi ñama’ẽ are”. Añete hápe jahecha heta tapicha oikéva tape karẽ rupi ohapýgui hesa upe pláta pota. Ojapo ojapo’ỹ vaerã ohupytységui mba’eta ha oimo’ãgui péicha oikotaha tuicha mba’éramo.

Jesús he’i ñandéve upe pira pire oñembojáraramo ñande rehe ndaikatúiha jahayhu añete Tupãme. Ñamboykéta ichupe ha upe viru oikóta ñandéve Tupãramo. Ivaiete piko aipóramo pe pira pire. Ñaikotevẽ niko upe platamíre, ajépa. Jakaru, ñañemonde, jajogapo, ñañepohano, ñañemoarandu ha javy’ami haguã. Ha umíva niko iporã ha hi’ã opavave ohupyty ha oreko oiko porã haguã py’a guapýpe.

Upe pira pire niko ndaivaíri ijehegui. Jaiporu porã ha jajapóramo ichugui peteĩ tembiporu jaiko porãve haguã oñondive ñepytyvõme oñopehenguéicha, opavavépe ohupyty haguãicha tembiapo repykue. Ñama’ẽ porã vaerãnte che reindy ha nde che irũ, noiméipa upe pláta pota taryrýi omanda iterei ñande rehe ha ñande jupe guarãnte ñama’ẽramo. Upe kuévo ijetu’úta Ñandejára ñanesãmbyhy haguã.

Pa’i Jasy.