Ñahendu Jesús Ñe’ẽ. Viernes 31° Durante el Año

Escucha el evangelio y la reflexión en: https://youtu.be/eh0GGe7H0FA

Viernes 31 Durante el Año Lucas 16, 1 – 8

Upérõ Jesús omombe’u kóva ko káso idisípulokuérape: Oiko ndaje raka’e peteĩ karai heta mba’e oguerekóva. Ha oje’e chupe ikapata oiporu vaipaha oikóvo ipláta. Ohenói upémarõ ikapatápe ha he’i chupe, “Mba’éiko ko oje’éva nde rehe. Kuatiápe emoĩmbaitéta chéve mba’éichapa reiporu reikóvo ra’e che pláta. Ha upéva ipaha. Ne remba’apo véima ápe.”

Pe kapata he’i ipy’apýpe, “Mba’éiko ajapóta añemosẽrõ. Na che mbarete véima niko aiko hag̃ua a’yvyjo’o hamba’e. Ha upéi ave, atĩta asẽ hag̃ua upe rupi ajerure ha’u va’erã. Aikuaáma mba’épa ajapóta areko haguã che moguahẽva hógape añemosẽ rire.”

Ha ohenói peteĩ-teĩme umi pláta oiporu va’ekue ipatróngui. Pe tenonde ou vaekuépe oporandu, “Mboýiko redeve che patrónpe”. Ha he’i chupe, “Adeve chupe 100 barril aséite de oliva”. Pe kapata he’i chupe, “Na’ápe nde kuatia, ha pya’e porã emoĩ 50”.

Upéva rapykueriguápe oporandu, “Ha nde piko mboy redeve”. Ha he’i chupe, “10 mil kílo trígo”. Pe kapata he’i chupe, “Na’ápe nde kuatia, pya’e porã emoĩ 8 mil”.

Pe kapata patron oikuaávo upéva, oguerohory chupe ijapu haguére osẽ porã hag̃ua. Ha upéicha niko ojapo umi omba’apóva umi mba’e yvy ári guare. Ha’ekuéra niko ikatupyryve umi Ñandejára rembipota apóvonte oikóvagui.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Oĩ niko ñande apytépe tembiapo ojejapóva ñepytyvõrã, ndaha’éi pláta rekávo katuete. Umíva ha’e mínga ha jopói. Upe mínga niko ñamba’apo oñondive ñañopytyvõ haguã peteĩ teĩ oikotevẽ hápe. Ha pe jopói katu ñame’ẽ ojupe pe jarekóvagui ha ñaha’arõ ãga upéi ñande rapicha orekóvove ombohasataha avei ñandéve upe ha’e ohupytývagui.

Oĩ niko ajépa umi tembiapo jajapóva ñagana haguã platami ha jahekáva oñemyengovia ñandéve hekópe. Ha upéva ningo iporã avei ha tekotevẽ jajapo jaiko porã haguã.

Papa Benedicto XVI (Caritas in Veritate) niko he’i ñandéve upe economía oguata vaerãha ojoykére peteĩ política porãre, ohekáva añete jeiko porãve opavavépe guarã. Ndaikatúi upe pláta pota año ñanesambyhy. Upéicha jahejáramo jahecháma oikoha tuicha sarambi. Tekotevẽ oike avei upe economía kuápe pe ñepytyvõ ha avei toñeme’ẽ upe oikotevẽvape, ha umi ohupytyvéva tomboja’o umi sa’ive orekóva ndive.

Jesús omombe’u ñandéve peteĩ káso jahechakuaa haguã mba’éichapa oĩ omohendáva ha iletrádova upe pláta jeporúpe. Upéicha avei ñande jaiporukuaa va’erãha upe jareko ha jahupytýva. Ndaha’éi jahekávo ventaja ñande jupe guarã año, ikatu haguãicha uvei opavavépe ohupyty Ñandejára remime’ẽ porãita.

Pa’i Jasy.