Ñahendu Jesús Ñe’ẽ. Martes 27º Durante el Año

Escucha el evangelio y la reflexión en: https://youtu.be/qinBP037xJw

Martes 27º Durante el Año Lucas 10, 38 – 42

Ohokuévo Jerusalénpe, Jesús ha idisípulokuéra og̃uahẽ peteĩ puéblope. Upépe, peteĩ kuña hérava Marta omog̃uahẽ chupekuéra hógape. Marta ndive oiko avei ikypy’y hérava María. Ha oho María oguapy Jesús ypýpe ha ojapysaka hína Jesús rehe. Marta
katu hembiapóva hína kosináme ha óga ñemopotĩme ha mba’e, upéi oñemboja Jesús rendápe ha he’i chupe:— Mbo’ehára, nde rehechakuaái piko chenteha pe omba’apóva, ha María ndojapoiha mba’eve. Ere chupe ta che pytyvõ.

Jesús ojere he’i chupe: — Marta, Marta. Heta mba’ére niko rejepy’apy hína. Ha rejepy’apy rei. Peteĩ mba’énte niko oĩ ovalevéva opa mba’égui. María oiporavo upéva, ha upéva ndoipe’a mo’ãi chugui avave.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Heta mba’e ñande rogagua ñande py’apy: karurã, ao, pohã, escuela, óga apo. Ñane angekói, sapy’ánte ndajakepái, jaju ha jaha, ñamohenda peteĩ ha jatopáma ambue isarambíva ñande hegui. Ñasẽ peteĩgui ha jaike jey ambuépe. Ndaipóri piro’y puku. Ha
añete hápe ñaikotevẽ niko tembi’u, ao, óga, tesãi. Ha opa umíva ndoúi ha’eño, ñañeha’ã mante jahupyty haguã ára ko’ẽre.

Ko’ápe jahecha Jesús oguahẽha Marta rógape ha ha’e oguerohorységui Jesús pe hy’ái omohendapa haguã opa mba’e oñeikotevẽva. Ha ikypy’y María katu oguapy ohendu Jesús pe, ijurujái upépe hína. Ha’ete ku mba’eve ndojapóiva ha Marta katu ipy’a ropútama hína.

Jesús he’i Mártape ha he’i avei ñandéve ndajapytáiva ha ñanekane’õva, ñama’ẽ haguã noiméipa itapykue ñande hegui upe tekotevẽvéva. Ha tekotevẽ añete ñamopa’ũ ñane rembiapo, ani ñande tarova ha ñaneresasẽ peve ñamba’apo. Tekotevẽ ñamboguapy ñande py’a, ñamopa’ũ ára ha ára japytu’u ha ñañembo’emi haguã, ñahendu haguã Ñandejára ñe’ẽ, ñañemongeta haguã Jesús ndive.

Jaha mísa hápe térã celebración pe domingo, jakaru Jesús mesápe ha ñañemopeteĩ hendive. Upéva ome’ẽta ñandéve pu’aka ñamboguata haguã opa mba’e ñande rekove rehegua, ha omyesakãta ñandéve ñande rape. Moõ gotyo pa jaha ha mba’éguipa
jajehekýi va’erã. Ojo’apáramo jepe ñande rehe opaichagua tembiapo ha ñande kupyliáramo jepe nañande reityichéne.

Aipóramo, ani rembyasy che irũ ha che reindy rembo’yke imi ha remopa’ũ haguã ne rembiapo ita, ehendu porãve ha eñandu pypukuve haguã Ñandejárape, ejotopa haguã hendive ñemongeta puku, ñembo’épe, neño térã nde rapichakuéra ndive oguatáva nendive avei jerovia pópe.

Pa’i Jasy.